(AP) – Amazon pronto lo haci medicamento cay for di shelo ora cu e gigante di comercio online bira e compania mas recien cu lo test delivery cu drone pa medicamento. E compania a bisa diaranson cu clientenan na College Station, Texas awo por ricibi nan medicamento na cas via drone dentro di un ora despues di haci nan pedido.
E drone, programa pa bula for di centro di delivery cu un botica sigur, lo biaha na e cliente su adres, baha na un haltura di mas o menos 4 meter y laga e pakete los. Amazon a bisa cu e clientenan lo por scoge for di un lista di 500 medicamento cu ta inclui tratamentonan comun pa condicionnan manera griep of pneumonia, pero no substancianan controla.
E compania su departamento Prime Air a cuminsa test delivery cu drone di articulonan comun den december ultimo na College Station y Lockeford, California. Amazon su vocero Jessica Bardoulas a bisa cu e compania a haci miles di entrega desde cu a lansa e servicio y lo expande pa inclui medicamento basa parcialmente riba peticion di clientenan. Durante diaranson, Amazon a anuncia cu tambe nan lo lansa delivery cu drone na un tercer localidad Mericano y ciudadnan na Italia ademas di Reino Uni pa fin di proximo aña. E compania a informa cu nan lo revela e localidadnan exacto den e lunanan binidero.
Amazon Prime ya caba ta entrega medicamento for di e compania su botica dentro di dos dia. Sinembargo president di e botica John Love a bisa cu esaki no ta yuda personanan cu tin malesanan agudo manera griep. “Loke nos ta purbando di haci ta wak con nos por mehora nos velocidad,” el a expresa. Hefe medico di botica di Amazon Dr. Vin Gupta a bisa cu Merca su sistema di cuido di salud hopi biaha ta encontra problema pa diagnositca y trata pashentnan rapidamente pa malesanan agudo, algo cu tabata aparente durante e pandemia di coronavirus. Disminui e bentana entre diagnosis y tratamento ta haci cu e tratamentonan lo ta hopi mas efectivo, el a splica.
Amazon no ta e prome compania cu lo explora e tipo di delivery aki via drone. E cadena di botica CVS Health a traha cu UPS pa test delivery den aña 2019 na Nort Carolina sinembargo e programa aki a caba segun vocero di CVS.
