Amazon a bisa diaranson cu e tin plan pa uza drones autonomo pa entrega paketenan na cas di su clientenan aki ‘algun luna’.
E gigante di compras online no a duna un fecha exacto, ni bisa unda e drones lo haci entrega. Amazon a bisa cu su drones nobo ta uza vision di computer y aprendisahe di mashin pa detecta y evita hende, of cabuya pa colga paña den cura ora di aterisahe.
“Desde paraglider pa waya di coriente na un corgi den cura, e celebro di e drone tin siguridad cubri”, segun Jeff Wilke, kende ta supervisa e negoshi di retail di Amazon.
Wilke a bisa cu e drones ta completamente electrico, por bula te 24km, entrega den 30 minuut, y hiba producto cu ta pisa te 2.3 kilogram, manera un buki of pasta di djente.
Amazon ta trahando riba entrega mediante drone pa añanan largo. Na december 2013, CEO y fundado di Amazon, Jeff Bezos, a bisa e programa noticiero ’60 Minutes’ cu drones lo bula na cas di clientenan dentro di cinco aña. Pero e fecha limite ey a pasa pa motibo di regulacion.
E Administracion Federal di Aviacion (FAA, siglanan na Ingles), cu ta regula uzo comercial di drones na Merca, no a contesta inmediatamente na un peticion pa comentario ayera. Na april, un subsidiario di e gigante di buskeda, Google, a haya aprobacion di FAA pa haci entrega mediante drone na algun parti di estado di Virginia.
Wilke a bisa cu e compania ta trahando cu varios agencia regulatorio pa ricibi aprobacion.
“Nos ta spera di haci esaki dentro di algun luna”, el a bisa.
