Riba e prome dia di competencia cual tabata diaranson ya caba Aruba a bay cu varios premio den e Pre-Spectrum cu ta lo siguiente. Den e categoria di Pleasure, e amazonanan Zoey Arends ta keda na prome luga y Natalia Mouawad na di segundo luga. Den Performance Elizabeth Johnson ta keda na di prome luga. Den e categoria di International Equitation, Elizabeth Johnson ta sali gana den e categoria di 10-15 aña, y Zoey Arends ta sali gana den e categoria di 16-24 aña, caminda Natalia ta logra un segundo puesto. Tambe riba e prome dia di competencia den Performance 3 year old Fillies, Melanie Wever ta competi su ehemplar logrando un prome luga, y despues den Campeonato di Performance Fillies & Mares, Melanie Wever ta keda Campeon hunto cu su ehemplar Sinfonia de United.

Ariba diabierna den e categoria di Pleasure Jr. Youth, Natalia Mouwad ta sobresali cu un prome luga, despues di a wordo compara cu dos otro amazona, uno di cual ta Zoey Arends cu ta keda na di dos luga. Den Performance Jr. Youth a competi Melanie Amazonanan di Aruba ta logra mas di 30 premio den Spectrum International Wever y Elizabeth Johnson, caminda despues di comparacion Melanie ta keda cu un prome luga y Elizabeth Johnson cu un di dos luga.

Remarkabel ta cu e categorianan di Pleasure y Performance no ta existi na Aruba, pues e amazonanan mester adapta nan mes na e rekisitonan di Estados Unidos, cu ta encera no solamente monta e cabay den e paso natural esta e paso corto di e cabay, pero tambe monta e cabay den un paso alarga (Paso Largo), y despues demostra nan dominio di hiba e cabay na un paso relaha, esta canando e cabay. Pues e amazonanan di Aruba ta demostra cu nan tin e habilidad y maneho pa adapta na cabaynan nobo y cumpli cu e reglanan di cada categoria y triunfa den esakinan. E amazona Melanie Wever a competi tambe cu su cabay den categoria di Classic Fino Stallions A/O (Amateur Owner), akinan e la logra un tercer luga den locual tabata un bataya fuerte entre basta participante.

E la competi den e categoria aki cu su cabay Caucus de Colores. Ariba diasabra e amazonanan a bolbe bek den ring, prome den e categoria di Youth Equitation, caminda Melanie Wever ta keda na di prome luga, Zoey Arends segundo luga, Natalia Mouawad di 5 luga y Elizabeth Johnson di 6 luga. Den International Equitation 7-24 aña Melanie Wever ta e unico representante di Aruba y ta logra un segundo luga. Den Classic Fino Jr. Youth Zoey Arends ta keda prome luga, Elizabeth Johnson segundo luga, y Natalia Mouawad di 6 luga entre 11 participante total caminda e huesnan a haci varios comparacion. Ariba e ultimo dia di Spectrum cual tabata diadomingo, e amazonanan a cuminsa cu e Campeonato di Pleasure Fino.

Akinan Natalia Mouawad gana segundo luga y Zoey Arends tercer luga. Despues den e Campeonato di Youth Equitation a keda campeon Melanie Wever, sigui pa subcampeona Zoey Arends y Natalia Mouawad tercer luga. Den International Equitation 16- 24 aña a keda Melanie Wever primer luga, Natalia Mouawad segundo luga y Zoey Arends tercer luga. Tambe Melanie Wever a competi su cabay Caucus de Colores den e Classic Fino Colts/Stallions Championship caminda a keda na di tercer luga.

Despues di basta dia di competencia, sin ningun duda a keda demostra cu e amazonanan di Aruba ta di altisimo calidad, caminda a domina den tur categoria cu a competi aden. Un palabra di pabien ta bay pa un y tur, como tambe e entrenadornan di e amazonanan.