Amelia Elskamp: “Sigui bo soñonan pasobra esaki ta bo momento, nos momento”

Amelia Elskamp ta un hoben di 15 aña di edad y recientemente el a keda corona como Miss Youth Aruba 2023. Den un entrevista cu Bon Dia Aruba, Amelia ta conta di su experiencia durante e certamen, kico el a gusta mas di su participacion y kico e certamen di beyesa a siñ’e.

Amelia ta bishitando Colegio Arubano y ta den Havo 4. Su hobbynan ta arte, hiking y scouting. E ta conta cu tempo e tabata chikito e tabata un mucha cu basta fantasia y imaginacion. El a sigui conta cu su lugar preferi tabata e cas di su wela pasobra e tabata siña hopi di nan y el a crece den un famia multicultural.

Pa loke ta su participacion, esaki ta prome biaha cu e ta participa den un certamen di beyesa y su mes a impulsa su mes pa participa den e certamen di Miss Youth Aruba. “E tabata mas como un desafio, considerando cu mi ta un persona basta timido y mi kier haci un cambio,” el a remarca.

Tocante su experiencia, el a conta cu nan tabata tres luna di hopi pasenshi, aprendisahe, sacrificio, siña con pa deal cu tension, pero alabes e ta hopi contento y agradecido cu e por a realisa e experiencia unico aki.

Durante e tres luna di e certamen e candidatanan a participa den diferente actividad. Amelia ta splica cu durante e actividadnan aki ta momento cu el a siña hopi cosnan nobo y el a tuma esaki como aprendisahe. Nan a ricibi informacion durante diferente seminario cu e por agrega na su parti di educacion. “Mi ta hopi agradecido na Miss Youth Aruba pa esaki,” el a resalta.

Amelia ta conta cu di henter e experiencia aki, un di su partinan faborito tabata cu e mester a crea un fundacion completamente nobo of bin cu un plan di mehoracion pa un fundacion existente. E fundacion cu Amelia a crea ta e fundacion GLOW, cu ta para pa Grow, Learn, Obey, Witness y cu esaki el a logra bay cu e titulo di miho proyecto di e certamen.

Actualmente Amelia ta den full preparacion pa representa Aruba den e certamen internacional Miss Teen Mundial 2023 cu ta bay tuma luga na Corsou y ta un di e certamennan mas importante pa hobennan.

“Mi lo haci esaki cu e mesun fe y confiansa cu mi a pone den Miss Youth Aruba y mi lo duna mi 200% sigur. Despues di e certamen di beyesa mi kier sigui esforsa mi mes pa cu mi estudio ya cu un di mi metanan personal ta pa gradua,” el a enfatisa.

Por ultimo, Amelia su mensahe pa hobennan di Aruba ta: “Semper keda amabel y fuerte na e persona cu bo ta conociendo (bo mes). Sigui bo soñonan pasobra esaki ta bo momento, nos momento.”