Diamars mainta a drenta e noticia lamentable cu e dolfijn Charlie, cual a gara atencion publico despues cu un grupo di dolfijn a aparece na canto di lama na Sarah-Quita Beach, a fayece despues di un trayecto di recuperacion cu tabata parce prometedor. Aruba Marine Mammal Foundation a confirma e noticia riba nan pagina di Facebook, bisando cu e mamifero marino cu a gara curason di pueblo a fayece net prome cu marduga dialuna anochi.

Den su publicacion, AMMF ta conta cu dialuna Charlie no por a wanta su mes mas riba awa, a pesar di a sigui un trayecto prometedor den su recuperacion. Desde cu AMMF a tuma encargo di Charlie su recuperacion, boluntarionan a carg’e 24/7 pa e no hoga. Na momento di su morto, boluntarionan ainda tabata cune.

Manera a splica, Charlie su curason a stop di bati 11:35 di anochi. E fundacion ta sigura cu el a fayece rapidamente y no a sufri. A sigura cu un autopsia ta na caminda.

Durante Charlie su recuperacion, AMMF repetidamente a subraya e importancia di percura pa un ambiente trankilo y liber di disturbio, enfatisando cu esaki ta critico pa e bienestar di e dolfijn. Na varios ocasion, e organisacion a ripiti apelacion pa publico mantene un distancia respetuoso, specialmente personanan nabegando den boto, riba jet ski y atletanan di wind/kite surfing. E organisacion a hasta instala varios boei y net den awa pa sigura cu no tin mucho disturbio den e zona di recuperacion.

Reaccion di publico

Comentarionan bao di e publicacion tabata yen di personanan expresando nan tristeza cu e fayecimento di e dolfijn stima. Varios a keda den shock ya cu a parce cu Charlie tabata recuperando bon den e ultimo dianan, respondiendo bon na criamento y tratamento cu antibiotica.

Apenas un siman pasa, AMMF a duna actualisacion cu e criatura tabata mas energetico, rapido y cu su vocalisacion tabata mehorando. Ademas, tabata parce cu Charlie tabata come bon, cu AMMF haciendo yamado continuo pa piscadornan trece sardin y masbango pa e bestia marino. Pues pa hopi e noticia di Charlie su fayecimento no solamente tabata un sorpresa, pero kisas tambe a dal mas duro.

Na otro banda, e fundacion tambe a haya critica den comentario, specialmente despues cu prome minister Mike Eman a publica un potret wantando e criatura. Hopi a lamenta di mira presencia di prome minister den e zona di recuperacion a pesar di no ta un boluntario ni experto den e esfuerso. Manera un comentario a bisa, “en bes di crea un zona di recuperacion protegi pa e animal y educa publico tocante respeta bida salvahe for di un distancia, e momento a bira un espectaculo planea.”

Otronan tambe tabata cuestiona con hopi humano por interveni den situacionnan asina. Varios a argumenta cu no ta saludable pa humanonan ta den contacto asina cerca cu bida marino, y cu “naturalesa ta dicidi” si e criatura ta sobrevivi su heridanan.

AMMF no a responde riba e criticanan aki.

Importante si pa sa cu AMMF ta un organisacion dedica na cuido di mamifero marino, unda e ta traha cu expertonan di varios otro sector pa brinda mamiferonan manera Charlie e miho chance di sobrevivencia, usando medicina moderno y adecua pa e animal. Pa e caso di Charlie, AMMF a haya asistencia tambe di Aruba Conservation Foundation, un otro organisacion cu ta dedica na conservacion y preservacion di nos naturalesa.