15reaccion (JO) (3).JPG

Gobierno a presenta su plan di maneho pa proximo aña den locual a toca diferente punto pero segun lider di fraccion PDR, no por a scucha nada nobo den e discurso nacional di gobernador pa locual ta hopi lamentabel mirando cu tin un aña electoral na caminda y no gobierno no a traha un fundeshi pa debidamente cuminsa trata hopi di e temanan menciona.
 

”Nos a tende di economia berde, un Aruba 100% sostenibel na 2020, ta bay tin yen di congresonan y seminarionan pero nos ta haya esaki poco tristo tin biaha te hasta chistoso pasobra e gobierno ta keda ripiti e cosnan ki mientras cu e tarea principal di gobierno ta pa bin cu leynan na parlamento y pone un fundeshi legal pa logra loke bo kier logra,” Parlamentario y lider di fraccion PDR, Andin Bikker ta bisa. Sr. Bikker ta agrega cu despues di ocho aña di gobernacion, PDR ta constata cu nan no por a wak ni un ley cu gobierno a bin cun’e parlamento caminda ta pone un base fiscal y estimulo pa loke ta trata economia cu ta propagandando awo. ”Nos ta haya esaki hopi lastima pasobra congreso cu seminario e sector priva mes por organisa, pero e ‘randvoorwaarde’ pa tin un inversion pa promove un economia ta e tarea y monopolio di gobierno anto nos no ta wak nada di esaki.” Segun sr. Bikker, nos tur sa cu den un aña electoral e posibilidad pa tin reunion publico ta menos kiermen lo tin menos temanan cu lo wordo trata cu en cambio menos trabao lo wordo haci.
 

”Gobierno a laga e oportunidad pasa di por a pone e fundeshi akinan. Den e discurso cu gobierno a skirbi pa gobernador nos a tende tambe cu ta papia di un brug, kiermen un hulpfunctie pa Aruba pero nos no tin ni un tratado riba e comercio cu a wordo poni den e ocho añanan aki. Nos ta bisa cu e gobierno akinan ta caracterisa su mes hopi biaha di papia hopi pero e tarea principal pa pone un base y traha fundeshi pa esaki e no ta realisa,” sr. Bikker ta bisa.
 

Parti social y atencion pa hubentud ta hopi atras

Parlamentario independiente y awor ex presidente di parlamento, Marisol Lopez Tromp ta bisa cu e ta haya hopi importante cu gobernador a enfoca riba e parti social y di hubentud. ‘E parti aki eigenlijk ainda tin hopi dificultad y caminda pa cana pa trece cambionan structural pa e beneficio di nos famianan cu ta den necesidad. Bo no tin nodi bay den un discurso largo, e parti ey ainda mester di hopi atencion,” sra. Lopez Tromp ta bisa.

 

Loke a resalta pa sra. Lopez Tromp ta cu gobierno a menciona pa bay den diferente districtonan  cual ta algo cu tabata t’ey antes caba. Ora cu gabinete Eman a sinta el a centralisa e ayudo, kita esaki for di e barionan anto pone nan tur por ehempel na Playa of San Nicolas. ”Aworaki ta descentralis’e atrobe. Esey ta mustra cu tin un necesidad pa ayudo ta mas cerca di cas cerca e famianan y cerca e hendenan.”
 

Apertura di refineria lo tene cuenta cu medio ambiente

Den su discurso diamars mainta, Gobernador Refunjol a bisa cu ”Gobierno di Aruba ta consciente cu desaroyo socioeconomico ta bay man den man cu proteccion di nos naturalesa.
Hunto cu Nacionnan Uni nos lo yuda na realisa e 17 metanan di desaroyo sostenibel pa asina compila y comparti conocemento cu otro islanan chikito den desaroyo.”
 

Segun parlamentario Marisol Lopez Tromp, el a scucha cu hopi atencion riba e parti di apertura di e refineria cu lo tene hopi cuenta cu medio ambiente pa cual sra. Lopez Tromp no ta mucho convenci di dje. ” Mi no ta mucho convenci di esey pero mi lo tin cu wak ora cu esaki wordo trata e leynan den parlamento,” sra. Lopez Tromp ta bisa.

 

LEAVE A REPLY

Please enter your comment!
Please enter your name here