Parlamento di Aruba a habri oficialmente su aña parlamentario 2026-2027 ayera diamars 8 di september, cu e discurso anual di Gobernador di Aruba, SE Alfonso Boekhoudt. E apertura ta marca comienso di un periodo nobo cu un agenda amplio, incluyendo presupuesto 2027, inversion publico, vivienda, salud y mercado laboral. Den su discurso, Gobernador a presenta e prioridadnan di gobierno, cu enfoke riba prosperidad comparti, sostenibilidad financiero y preparacion di Aruba pa e retonan futuro.

Manera custumber, apertura oficial di aña parlamentario 2026-2027 a tuma lugar un dia despues cu Parlamento a cera e aña parlamentario 2025-2026 cu un reunion publico. Durante e reunion di ciere dialuna, parlamentarionan a vota tambe pa scoge e presidente y vice presidente di Parlamento pa e periodo nobo.

Como resultado di e votacion, Marlon Sneek (AVP) a ser reeligi como presidente di Parlamento cu 12 voto, mientras Ruthlyn Lindor (Futuro) a ser eligi como vice presidente, tambe cu 12 voto.

Den su discurso di apertura, Gobernador di Aruba a subraya 2026 manera un aña simbolico pa Aruba, cu celebracion di 40 aña di Status Aparte y 50 aña di Himno y Bandera. Gobernador a conecta e momentonan historico aki cu responsabilidad di cada generacion pa conserva loke Aruba a logra y, na mesun momento, prepara e pais pa futuro den un mundo cu ta cambia constantemente.

Un di e temanan central den e discurso tabata sostenibilidad di finanzas publico. Gobernador a indica cu Gobierno lo sigui cu un maneho financiero prudente y uzo responsabel di recursonan publico. Tambe gobierno kier introduci gradualmente un manera di prepara presupuesto basa mas directamente riba maneho, metanan y resultado, mientras mas uzo di dato mester contribui na transparencia y decisionnan mihor fundamenta.

Riba tereno economico, Gobernador a indica cu gobierno kier sigui amplia e base economico di Aruba, creando oportunidad den agricultura, tecnologia financiero, economia blauw, industria creativo y energia limpi, entre otro. Turismo lo sigui hunga un rol esencial, pero Gobernador a señala cu e meta di Gobierno no ta crecemento continuo. Enfoke lo ta riba un sector turistico sostenibel y den balansa cu capacidad di Aruba, cu calidad, participacion local y calidad di bida como puntonan central.

Inversion publico ta otro tema importante pa e periodo nobo. Gobernador a indica cu, despues di aprobacion di e ley pa crea r Fondo di Inversion, Parlamento lo trata e prome presupuesto di e fondo durante e aña parlamentario 2026-2027. Gobierno tin intencion di presenta inversionnan cu por inclui un MFA na San Nicolas, mehoracion di bario, renobacion di scol y monumento, reforestacion y embeyecemento di centronan di ciudad.

Vivienda pagabel tambe ta un prioridad. Gobernador a indica cu Gobierno a desaroya un maneho nobo pa stimula construccion di mas cas pagabel den cooperacion cu sector priva. Na mesun momento, gobierno kier sigui inverti den espacio publico y facilidadnan comunitario, como tambe den revitalisacion di Oranjestad y San Nicolas.

Riba tereno social, Gobernador a indica cu gobierno lo sigui dedica atencion na poder di compra, seguridad social y oportunidad pa famianan progresa. Den su discurso el a menciona diferente medida implementa anteriormente, entre otro aumento di pensioen y bijstand, eliminacion di prima di AZV pa pensionadonan, reestablecemento di e pakete completo di remedi y ampliacion di sosten pa personanan cu discapacidad y famianan cu yiu na scol. E direccion general, segun e discurso, ta pa progreso economico di Aruba yega mas directamente cerca ciudadano.

Den salud y cuido, Gobernador a indica cu gobierno lo sigui reforma y fortalece e sistema, cu mas enfasis riba prevencion, deteccion trempan, cuido di prome liña y salud mental. Un di e pasonan importante anuncia ta introduccion di Landsverordening Langdurige Zorg, cu mester crea un base financiero duradero pa cuido continuo, incluyendo cuido den casnan pa adultonan mayor y rehabilitacion.

Un revision di Landsverordening Algemeen Pensioen tambe lo yega Parlamento pronto. Ademas, Gobernador a anuncia cu gobierno lo presenta un ley nobo pa duna asistencia financiero adicional na famianan cu muchanan cu necesidadnan special. Prevencion y deteccion trempan di pobresa, violencia domestico, mal uso di alcohol y otro retonan social lo sigui haya atencion.

Riba mercado laboral, Gobernador a indica cu gobierno lo presenta un proyecto di ley pa acopla salario minimo na bestaansminimum. E cambio lo bay hunto cu sosten pa empresanan mediano y chikito, cu intencion di sostene nan fortalesa mientras salario di empleadonan ta mehora. E propuesta por bira un di e proyectonan legislativo cu lo haya atencion particular durante e periodo nobo.

Educacion y hubentud ta forma otro parti importante di e agenda. Gobernador a indica den su discurso cu gobierno lo sigui transforma enseñansa pa crea un sistema mas integra, cu mihor conexion entre educacion, cuido y trabao. Profesionalisacion di maestro y multilingualismo ta parti di e proceso. Pa hobennan, atencion particular lo bay pa prevencion di criminalidad hubenil y cooperacion entre diferente instancia pa evita cu hobennan cay den cadena hudicial.

E discurso tambe a dedica atencion na medio ambiente y seguridad. Gobernador a indica cu gobierno lo sigui cu recuperacion di ecosistema y e programa nacional di reforestacion, cu ambicion pa planta 100.000 mata durante e periodo actual di gobernacion. Riba seguridad, gobierno lo sigui inverti den polis, brandweer, control di frontera y otro servicio, mientras seguridad cibernetico y preparacion pa crisis tambe lo haya mas atencion.

E apertura di e periodo nobo ta tuma lugar, sinembargo, despues di un aña parlamentario den cual fraccionnan di oposicion a expresa critica tocante e relacion entre gobierno y Parlamento, particularmente riba transparencia, acceso na informacion y tardansa pa contesta pregunta. Recientemente, PPA a critica cu un peticion presenta mas cu un aña pasa pa tene un vragenuur cu minister di Asuntonan Economico, Geoffrey Wever, tocante Free Zone Aruba no a conduci na e reunion solicita prome cu ciere di e aña parlamentario.

Otro discusionnan durante e periodo anterior tambe a pone atencion riba e responsabilidad di gobierno pa duna Parlamento informacion necesario pa por ehecuta su funcion di control. E criticanan aki ta forma un otro contexto pa e aña parlamentario nobo: banda di tratamento di presupuesto y e diferente proyectonan di ley anuncia, e manera cu gobierno lo contesta pregunta y peticion di informacion for di Parlamento probablemente lo keda un tema di atencion.

Cu apertura di aña parlamentario 2026-2027, e prioridadnan presenta door di Gobernador awor ta pasa pa Parlamento. Debate, disponibilidad di recurso y implementacion lo determina cuanto di e metanan di gobierno por ser transforma den resultado concreto. Gobernador a declara oficialmente e aña parlamentario habri conforme cu Staatsregeling.