ARA mester bira totalmente independiente pa por cumpli cu su trabao di auditoria

Auditoria General di Aruba (Algemene Rekenkamer Aruba), ARA no tin su mesun presupuesto ni un ley adecuado pa ehecuta su investigacionnan, ademas cu no por apunta su mesun personal pa asina presenta Parlamento rapportnan di nivel pa asina por hiba un miho maneho na Aruba. Di otro banda, ARA mes tin trabaonan interno pa mehora funcionamento. Esaki ta conclusion di e prome analisis interno riba e forma con ARA ta funciona.

E analisis interno ta basa riba standard y metodologia internacional cu e instituto a compromete na dje.

Manera ta conoci, ARA tin tempo ta purba informa ex Presidente di Parlamento mr. Juan ‘Ady’ Thijsen, cu su e investigacionnan no ta yega na e nivel cu mester pa Aruba. ARA a conclui su analisis basico cu mester sirbi como e fundeshi pa midi si ta cumpli cu standardnan internacional.

Manera ta conoci, ARA a manda varios carta pa Parlamento pa pidi reunion y informacion pa asina por a haya cooperacion di e instituto legislativo pa mas cooperacion.

Tabata pa medio di un carta di 18 di September 2020, cu ARA a informa e tempo ey Presidente di Parlamento mr. Thijsen riba e asina yama Performance Measurement Framework assessment, esta e evaluacion di e cuadro di midi funcionamento di ARA, pero tambe e introduccion di e Supreme audit institution Independence Rapid Advocacy Mechanism, SIRAM. SIRAM ta un mecanismo pa sigura independencia di institucionnan manera ARA. E ta considera un rekisito critico pa un instituto di halto di auditoria manera ARA por cumpli cu su mandato.

Independencia di ARA

E independencia di ARA di otro entidadnan ehecutivo cu e ta controla ta fundamental den su papel den responsabilisacion publico y den crea confianza entre e pais y sociedad. E papel esencial di independencia di un organo manera ARA a keda reafirma pa diferente tratado, y confirma pa dos resolucion di Nacionnan Uni. E resolucionnan aki ta urgi paisnan miembro pa promove eficiencia, responsabilisacion, efectividad y transparencia di administracion publico, entre otro pa medio di fortificacion di entidadnan manera ARA y specificamente e independencia di e institucion.

Evidencia ta mustra cu nivel di independencia financiero y operacional ta hopi abao y varios pais ta nenga di duna e autoridad independiente na organonan di auditoria. E forma mas comun ta interferencia cu presupuesto di e organo, of no ta delibera y duna contenido na e recomendacionnan den e rapportnan. Es mas, hopi biaha un organo di auditoria ta confronta restriccion pa publica resultado di nan auditoria.

Pa tal motibo mes, rond mundo a dicidi cu e independencia di un instancia manera ARA ta un prioridad y revision cu cumplimento cu tratadonan ta supervisa pa INTOSAI, esta e organisacion internacional pa institucionnan supremo di auditoria. E independencia ta crucial pa responde na ora y efectivamente na desaroyo politico of otro reforma legal cu por tin impacto negativo un instancia manera ARA. E menasanan aki por manifesta pa medio di amiendanan den Constitucion, cambio den presupuesto y ley di auditoria, busca forma pa kita ehecutivonan of simplemente tarda pa nombra e personal necesario.

No a warda riba Parlamento

Tabata na 2020 tambe cu ARA a dicidi pa haci su evaluacion basa riba modelo y metodologia Cuadro di Midimento di funcionamento (PMF), ya cu kier adopta e Standard Internacional pa Contralorianan General (ISSAI). Tur esaki ta necesario pa identifica e puntonan fuerte y debil di ARA pa asina mehora su funcionamento internamente y demostra su balor na tur ciudadano. Meta ta pa mehora e proceso y calidad di auditoria.

Dos area di adaptacion

E analisis mes a inicia na Juli 2020, cu a cubri tur parti di e organisacion, cu ta inclui e cuadro legal, maneho di recurso humano, comunicacion y tambe e fuentenan financiero.

E rapport a keda conclui dia 18 di Juni 2021 y tabata evalua pa un experto internacional independiente, pa mira si a sigui e metodologia manera mester ta.

Dos area a bin dilanti cu mester di adaptacion. Esakinan ta e cuadro legal di ARA y e necesidad pa mehora calidad di e rapportnan segun e standardnan internacional. ARA ta trahando caba riba un cambio di e Ordenanza Nacional pa Contraloria General, cu lo nifica cu mester bin cambio den Constitucion di Aruba y e Regulacion di Cumplimento di 1989. E cambionan aki lo contribui na percura cu ARA ta completamente independiente di Gobierno y Parlamento cu na turno lo mehora su funcionamento.

No tin cuadro aceptabel di raporta

ARA no ta haci un auditoria financiero debido di finanzas di Pais Aruba, y motibo ta cu te ainda ni Parlamento ni Gobierno a dicidi riba un cuadro di aceptabel di raporta. E cuadro legal ta basa riba un ley di 1989 cu no ta inclui un sistema adecuado pa traha rapportnan financiero cu por usa pa e auditoria financiero. Consecuentemente tin varios deficiencia den e area di control interno. ARA no tin mucho influencia riba e falta di un cuadro financiero aceptabel. Esey ta e motibo cu regularmente tabata pidi reunion cu Parlamento pa trece cambionan den ley, pero manera a mustra den e cartanan, e esfuersonan tabata envano te cu awor.

Falta personal

E resultado ta cu awor e evaluacion interno ta mustra cu ARA no a logra haci suficiente auditoria. Un otro motibo ta cu falta personal. ARA no por ehecuta tur e controlnan planea y no por cubri tur area cu mester investiga pasobra pa añanan caba tin un falta di capacidad cu ta alrededor di 45 porciento, cu ta casi mita di locual mester. E falta di personal capacita ta concentra netamente den e funcionnan halto di investigacion. Motibo pakico no por busca personal ta pasobra ARA mes no tin e mandato legal pa apunta hende. Ademas, e remuneracion, esta e salarionan di e personal ta mara na condicionnan di Gobierno, cu pa hopi experto, no ta uno atractivo. Segun planificacion, ARA mester di un ekipo di 18 persona capacita, pero solamente tin 10 den servicio.

E conseho ta pa ARA por haya su mandato legal pa asina apunta su propio personal sin cu mester perde tempo y asina perde e candidatonan pa e funcionnan habri. Pero pa ARA logra esaki, mester di Parlamento pa haci e cambionan den ley. Aunke cu ARA tin e hermentnan den su man pa percura cu tin control riba cifranan di Pais Aruba, e no tin e facilidad pa busca e hendenan necesario pa haci e trabao na forma debido.

Plan Strategico

Locual si ta algo cu ARA mes mester mehora ta den su planificacion, esta cu mester tin un plan strategico cu obhetivonan pa asina aumenta e cantidad di auditoria. Den otro palabra, ARA mester bin cu plan anual cu ta alinea na accionnan concreto pa aumenta e cantidad di auditoria. Tambe ARA mes mester percura cu e forma con ta haci e controlnan ta cumpli cu e standardnan internacional, pero prome cu esey por sosode, mester adopta y implementa esakinan formalmente. Na e momentonan aki e calidadnan di rapport di ARA ta garantisa pa motibo cu ta usa manualnan di e Auditoria General di Hulanda y pa motibo cu e personal a haya hopi sosten di e instancia Hulandes y tin experticio caba den nan trabao.

Pero asina mes, e revision independiente ta urgi pa adopta e standardnan internacional pa asina hisa calidad di cada investigacion specifico, pa di e forma ey por haci e controlnan debido.

Di otro banda, ARA no tin un procedura di comunicacion y hermentnan necesario y esaki si ta cay bao su propio control. Segun e analisis, mester tin un strategia di comunicacion bon defini y contacto regular cu tur ‘stakeholder.’ Sinembargo, no a identifica kendenan tur ta considera ‘stakeholder.’ Unabes cu tin un plan di comunicacion por identifica tambe kico ta e hermentnan y acercamento pa comunicacion externo, ta e conclusion.

Constitucion actual no ta duna ARA su independencia completo

E independencia cu Constitucion di Aruba ta duna ARA no ta garantisa grado halto di iniciativa y autonomia. E Ordenanza Nacional di Auditoria tampoco ta duna e autonomia completo, cu ta contra e Declaracion di LIMA cu ta bisa cu e independencia di un ARA mester ta hancra den Constitucion y cu mester tin proteccion legal contra cualkier interferencia riba e mandato pa haci e auditoria y independencia di e institucion.

Algun di e rapportnan di ARA a resulta den mehoransa den funcionamento publico, pero no a midi con y na ki grado. Ademas pa motibo di tur e factornan cu ta stroba un funcionamento optimal, no tin e mesun cantidad di investigacion y auditoria cu ta desea. Auditoria y investigacion continuo ta na beneficio di e ciudadano, segun e analisis interno, ya cu ARA por fungi como modelo pa funcionamento etico, transparente y responsabel.

Pero pa esey mester di tanto Parlamento pa cambia leynan y mehora e puntonan debil interno, manera comunicacion y plan strategico.