25juniNG Andina Nicolaas (1).jpg

FPNC a wordo funda pa brinda famianan den nos comunidad cu pa un motibo of otro ta pasa den un situacion dificil di bida door di duna un poco alivio pa loke ta trata necesidadnan basico manera cuminda. Pa mas di 6 aña FPNC ta brinda sosten na e famianan aki pa medio di e Foodbank cu su servicio di pakete di cuminda, paña, mueblenan y otro articulonan di primera necesidad.

 

Un total di mas di 2750 famia a ser yuda durante e ultimo añanan. Na e momento nan aki FPNC ta yudando 70 famia pa luna structuralmente y 25 pakete di crisis pa luna. E demanda pa paketenan di crisis cada luna ta crece mas y mas.

 

FPNC ta cumpra tur su articulonan pa pakete y esaki ta varia entre 40 y 60 florin pa luna pa pakete. E paketenan ta consisti di articulonan basico manera aros, pasta, tuna, papel di W.C, pamper, lechi y mas. Esaki ta yega pa un famia di 4 persona pa aproximadamente 2 siman dependiendo di e consumo. Cifranan di 2015 ta mustra alrededor di 65% di nos clientenan ta hende muhe.

 

Un 63% di nos clientenan ta cay den e categoria di 40 pa 60 aña di edad. E districtonan Oranjestad, San Nicolas y Noord ta e districtonan cu mas tanto clientenan registra. Nos clientenan ta entre otro persona (famia) (cu yiu of sin yiu) cu no tin trabao of a perde trabao, hende di edad cu no tin un pensioen complementa, personanan (famia) ricibiendo onderstand, personanan (famia) ricibiendo onderstand pa hendenan cu limitacion, persona (famia) cu problemanan di debe, y persona (famia) cu entrada bou di salario minimo. FPNC ta traha cu mas di 40 instancia cu ta manda nan clientenan, cu un laso di cooperacion extenso.

 

E vision di FPNC ta pa por logra su independencia y un stabilidad financiero pa asina por keda yuda esunnan di menos recurso a largo plaso. E reto mas grandi di FPNC ta pa logra e edificio pa por garantisa servicionan a largo plaso. E edificio unda FPNC su Kringloop winkel ta situa su contracto ta caba fin di juli anto e doñonan ta desea di bende esaki. FPNC a ser ofreci pa cumpra e edificio pa AWG.170.000,– .

 

Organisando e Radiothon awor dia 1 y 2 di Juli FPNC ta spera di por conta cu apoyo di sector priva como tambe esunnan cu por yuda cu un donacion pa logra cumpra e edificio den Emmastraat. FPNC ta haci un suplica na e pueblo Arubano pa acudi dia 1 y 2 di juli masalmente riba e parkeerplaats di Palm Beach Plaza pero mas importante si por contribui na e bon causa aki pa asina FPNC por sigui yuda esunnan di menos recurso den nos comunidad. 

 

Por ultimo FPNC kier a gradici tur medio di comunicacion como tambe tur e partner, musico y bandanan cu a join a causa aki pa yuda FPNC.

Pa mas informacion di con por haci donacion of sea bira un boluntario por tuma contacto cu FPNC na 588-0002. Tambe por pasa na nos oficina na Emmastraat 16. Corda like e page nobo di FPNC pa keda altanto di tur movecion. Facebook:

www.facebook.com/fundacionpanoscomunidad.