Home Local Andrew Hoo nombra como nobo alto comisario interino

Andrew Hoo nombra como nobo alto comisario interino

437
Andrew Hoo

Andrew S. Hoo ta nombra como alto comisario interino di cuerpo policial. E ta reemplasa Dolfi Richardson, cu lo ocupa e oficina di Interpol aki na Aruba.

Minister di husticia, Andin Bikker a anuncia e decision pa loke ta trata e mando di cuerpo policial ayera merdia.

Paralel cu nombramento di Sr. Hoo, lo cuminsa cu e procedura di solicitud na cual tur persona por solicita, incluyendo Sr. Hoo, pa asina yega na e alto comisario definitivo, segun e relato di minister di husticia. “Tarea principal di sr. Hoo ta pa trece union trankilidad y mas cu tur cos garantisa siguridad di tanto e pueblo como e bishitante pa Aruba su economia sigui florece”, minister Bikker ta bisa.

Segun e relato di e minister nan a bay den un proceso di consulta ‘sumamente amplio’ pa busca un persona cu por bira un hefe di polis interino.Durante e proceso a consulta cu coalicion y oposicion den parlamento, a papia cu diferente persona den cuerpo y tambe esunnan cu pensioen for di cuerpo pa yega na un decision, minister Bikker  ta sigui bisa den e comunicado.

Lo bay tin un fase di transicion cu lo tuma luga aki un par di siman. E tareanan di sr. Hoo, segun e mandatario ta pa trece ‘union den e cuerpo, trece trankilidad y tambe percura tur demanda basico pa loke ta trata material haya atencion’.

“Mester hiba cuerpo policial den un dimension nobo pa loke ta trata aplicacion di tecnologia cu mundialmente ta yuda tur cuerpo policial pa brinda un miho servicio pa pueblo y e bishitante”, segun minister Bikker.

Sr. Hoo a cuminsa den e cuerpo na aña 2001. E tin un diploma MBO politieopleiding niv. 4, Politie Academie te Appeldoorn, Bachelor  Of Science Hotel Administration, Associate of Science Hotel Management y Executive Master of Tactical Policing major in General Leadership.

Sr. Hoo ta casa y tin dos yiu.

El a bay forma parti di e famia di Marriott Hotel Aruba como Complex Director of Loss Prevention and Risk Management y pa awor asumi su funcion di hefe di polis interino.