(AP) — Den un documento entrega den corte riba diamars, Angelina Jolie ta bisa cu durante un vuelo na 2016, Brad Pitt a gara su cabes y sacudie, y despues a choca un di su yiunan y a dal un otro ora nan a purba di defend’e.

E descripcionnan di abuso riba e vuelo priva a yega den un contra-demanda cu Jolie a entrega den e disputa di e pareha tocante un cas y viñeda na Francia cu tabata propiedad di e pareha, cu ta separa di nan divorcio andando, cual Jolie a solicita tiki despues di e incidente.

Un representante di Pitt, kende no tabata autorisa pa papia publicamente, fuertemente a rechasa acusacionnan di Jolie y a yama nan “otro ‘rehash’ cu ta djis haci daño na e famia”.

E acusacionnan di abuso riba e avion a bira conoci publicamente pa prome biaha tiki despues di e vuelo, pero reportahenan tabata inicialmente vago y detayenan tabata scondi den documentonan di divorcio y investigacionnan di FBI y Departamento di Mucha y Servicionan di Famia di Los Angeles, ambos cu a haya cu ningun accion contra Pitt tabata necesario.

Un hues a duna Pitt 50-50 custodia di e muchanan despues di un huicio tras porta cera den cual a presenta e acusacionnan. Pero despues un corte di apelacion a descualifica e hues priva pa no a revela posible conflicto di interes despues di un mocion di Jolie, anulando e decision.

Mas detaye di e acusacionnan a keda revela e aña aki ora un demanda di Jolie contra FBI tocante un solicitud di Libertad di Informacion a bira publico.

E documento ta bisa cu dia 14 di september 2016, Jolie, Pitt y nan seis yiu tabata biahando for di e viñeda Chateau Miraval na Los Angeles. E comportamento agresivo di Pitt a cuminsa prome cu e famia a yega na e aeropuerto, segun e documento, cu Pitt confrontando un di e muchanan. Despues cu e vuelo a sali, Jolie a puntra Pitt kico a pasa, y Pitt a acus’e di ta demasiado deferente na e muchanan y a atak’e verbalmente.

Despues el a gara su cabes, sacudie, gara su schouder y sacudie atrobe. Un di e muchanan a defende Jolie, y Pitt a atak’e.

Segun e documento, Pitt a tira cerbes riba Jolie y biña riba e muchanan. Jolie a duna keho di esaki na investigadornan di FBI den e siguiente dianan, cual a aparece den un rapport redacta di e agencia. Den esaki, Jolie a bisa cu el a mira Pitt dal un of dos bebida, pero cu e no tabata mustra intoxica.

E investigadornan a reuni cu fiscalnan federal, y “tur partido a acorda cu no lo sigui cu cargonan criminal den e caso aki pa varios factor”.

Un declaracion di FBI a bisa cu a “haci un revision di e circunstancianan y no ta bay busca mas investigacion”.

E actor ganador di Oscar y director di 47 aña, Jolie, y e actor ganador di Oscar di 58 aña, Pitt tabata entre e parehanan mas prominente di Hollywood durante 12 aña. Nan tabata pareha romantico pa un decada na momento cu nan a casa na 2014. Jolie a pidi divorcio na 2016, y un hues a declara nan soltero na 2019, pero e caso di divorcio ainda no ta finalisa cu asuntonan di custodia y finanzas ainda den disputa.