MO-B tech lab ta e bus tecnico cu a pone riba caminda cu intencion di crea un metodo pa muchanan siña ciencia y tecnologia. Prome ministro Evelyn Wever-Croes a comparti tocante e proyecto.

Na october 2018 a introduci e proyecto cu intencion pa crea un metodo pa muchanan por siña y ser conoci cu ciencia y tecnologia. Tambe pa nan por kico tur e muchanan por haci den un forma di wega.

Nan a obtene un di e bus di ‘bibliobus’ anto transform’e den un bus interesante, innovativo y educativo pa e muchanan participa. E proyecto a wordo haci en colaboracion cu Futura. Nan ta e fundacion cu gobierno a institui, cu ta encarga pa ‘empodera e vision y innovacion di nos gobierno’. Hunto cu Futura, tambe ta Metabolic Foundation.
El a bisa cu fondo pa e proyecto aki a bin 75% di Union Europeo. Biblioteca Nacional tambe a duna aporte, den cooperacion cu minister di enseñansa, Rudy Lampe (RED).

E bus a bay den diferente centro y Traimerdia. “Na e momento aki, 6,000 persona incluyendo adulto, studiante, profesor, mayornan y muchanan a bishita y participa den e proyecto. Na prome instante e proyecto aki tabata mester a pasa na Traimerdia so, pa e muchanan haci uzo di dje.”

Sinembargo e ta bisa cu ora otro scol a wak, nan tambe tabata kier a experiencia, ‘e no a keda limita, anto el a bay scol tambe’. Studiante na Aruba tin oportunidad semper pa bishita e bus y siña experimenta cu ciencia y tecnologia.

E meta di e bus aki, segun e mandatario, ta pa atrae e futuro generacion di profesor pa explora diferente metodo pa duna les. Nan ta spera cu e proyecto aki lanta e interes den hoben pa traha cu tecnologia, y pa docente mira con facil ta pa siña mucha, en bes di ‘keda den e mesun sistema pa duna les’.

Durante siman cu ta bin, e bus lo participa den varios actividad den comunidad y campamento di mucha durante vakantie. “E obhetivo di e programa pa sigui traha fundeshi y diversificacion di Aruba su economia y pone muchanan mas interesa den ciencia, tecnologia, ingenieria y matematica.”

El a expresa cu lo purba prepara ‘nos muchanan pa habilidad cu tin mester pa ta exitoso den futuro’. Un proyecto cu a finalisa cumpliendo cu un aña di ehecucion ‘esaki ta pasobra un trece impacto grandi’.

Pa finalisa e mandatario a bisa cu mester trece hoben den contacto cu tecnologia mirando cu ta algo cu ta transformando lihe. “Mester prepara nan pa futuro pa motibo cu nos no sa den kico nan lo traha y trabou cu por ta ainda no ta existi.”