Home Deporte Anthony Rasmijn ta logra un record nacional pa Aruba

Anthony Rasmijn ta logra un record nacional pa Aruba

681

Evidentemente e atleta Arubano di atletismo, Anthony Rasmijn a core un bon careda riba e 400m, el a sa na kibra su propio record y esun di Aruba cu un tempo di 49.20, den e mundial di atletismo indoor na Birmingham, Inglatera. Esaki ta segun e fuente 297 Sports.

Indoor nunca no tabata Anthony y su coach nan meta pa e aña aki. Pero asina mes Anthony a logra baha su tempo di 400m indoor di 2 aña pasa, for 50.80(2016) te 49.20 (2018).
Core e tempo aki foi awor aki caba ta duna un bon indicacion cu dentro den un par di luna ora e temporada di outdoor cuminsa e atleta Arubano lo ta coriendo por lo menos un seconde mas duro. Anto esey lo nifica cu nan ta hopi cerca di e cualificacion standard pa CAC den e luna di juli cu lo tuma luga na Barranquilla, Colombia.


Mester bisa cu falta un careda mas pa termina e temporada di indoor, cual por cierto ta e evento ” NK pa studenten” na Apeldoorn(NED) cu lo tuma luga 10 di maart. Despues lo cuminsa cu preparacion nan pa invierno. E experencia di e evento aki tabata tin un super bon impacto riba su persona y sigur lo e lo uza esaki como un boost pa ora nan bay cuminsa drenta e training pa temporada di outdoor.

“Mi no tin masha experencia cu core indoors. E biradanan ta hopi mas skerpi y e pida stret ta hopi cortico compara cu e pista cu mi ta train riba dje tur dia. Anto foi lane 2 ta na un tiki desbentaha den indoor ,paso no por haci uzo di e downhill manera e lane nan mas pafo si por probecha for di dje” Anthony a comenta.