Home Regional Antigua & Barbuda ta bandona reunion di OEA

Antigua & Barbuda ta bandona reunion di OEA

425

(CaribbeanNewsNow) Washington- Antigua y Barbuda e siman aki a termina nan participacion den e di dos reunion preparatorio pa e cumbre de las Americas programa pa tuma luga na Lima, Peru na april, despues di e exclusion di Venezuela di participacion.

Sir Ronald Sanders, embahador di Antigua y Barbuda na e organisacion di Estadonan Americano  (OEA), cu ta responsabel pa preparacion di e cumbre, a splica cu su pais a retira di e reunion riba un punto di principio fundamental.

El a nota cu den e reunion preparatorio gobierno di Venezuela a keda exclui di participacion, sin un splicacion o discusion previo di e estadonan miembro di OEA na ningun nivel.

“Exclusion di Venezuela di e segundo reunion preparatorio ta curioso pasobra e tabata un participante completo y constructivo den e prome reunion un par di siman pasa”, Sanders a argumenta.

E unico motibo duna pa exclusion di Venezuela ta cu Peru, e pais anfitrion di e cumbre, a dicidi cu no mester permiti Venezuela participa.

“Mientras cu e pais anfitrion tradicionalmente tabata por invita un representante halto di un pais cu no ta estado miembro, no ta aceptabel pa rechasa un miembro actual di e organisacion cu ta planea y ehecuta e cumbre.

“Mi kier laga sa bon cla cu nos posicion ta referi na tur estado miembro, no Venezuela so. Si ta permiti esaki sucede, anto cualkier estado miembro di OEA por keda exclui di un cumbre o un asamblea general, riba e solo deseo di e pais anfitrion”, Sanders a conclui.

Consecuentemente,e hefe di mision interino di Antigua y Barbuda na OEA, Joy-Dee Davis, a duna e siguiente declaracion prome cu el a bandona e reunion di diaranson pasa:

“Antigua y Barbuda no conoce, ni a participa den ningun decision oficial di e Cumbre de las Americas, di asamblea general di OEA, e reunion di consulta di Asunto Exterior o di e conseho permanente pa separa ningun estado miembro activo di e reunionnan aki. Nos ta haya e precedente di exclusion unilateral aki desconcertante y inaceptabel.”

“P’esey, a base di esey y te ora cu coregi e situacion aki, Antigua y Barbuda ta lamenta cu e no por participa na e reunion aki.”