Diadomingo riba red social a surgi varios publicacion di ambos local y turistanan mustrando cu e anker situa na entrada di Colony—cual ta famoso pa su color cora—ta actualmente ser bao mantencion y a ser pinta na color blauw representando nos bandera.

Na momento cu potretnan a surgi, hopi den comentario a cuminsa lansa nan pregunta di kico e desaroyo aki lo por ta, cu algun expresando preocupacion si lo deshaci di e color cu e anker tabata famoso p’e permanentemente.

Ta parce cu e cambio aki tabata basta divisivo den comentario, unda algun turista a elogia e cambio pa refleha bandera di Aruba, mientras cu otro no a gusta con el a keda: “It completely disappears against the sea backdrop. A poor design decision,” manera un usuario ta bisa.

Sinembargo, hopi a nota cu e cambio ta bin pa conmemora 40 aña di Aruba su Status Aparte, cual lo ser celebra e luna aki hunto cu Dia di Himno y Bandera. Segun algun comentario ta bisa, e anker lo haya su pintura cora despues di 18 di maart.

Segun Sr. Hilario Doncker—voz conoci den pueblo—ta splica riba Facebook, e color blauw en berdad ta pa celebracion di 40 aña di Status Aparte, y di e hecho cu e aña aki Charlie’s Bar lo celebra 85 aña di existencia.

A sigui splica cu e na aña 2005 a pinta e anker cora, pasobra esaki tabata e color faborito di su difunto tata, Charles Brouns Jr. na ken e anker ta dedica. Un usuario—yiu di Charles Brouns Jr.—a agrega cu un di e metanan di su tata tabata pa pone un spotlight riba San Nicolas. Despues cu e refineria a cera na 1986, tabata cla cu lo mester bin un otro pilar economico den e districto y asina e monumento di e anker cora a bira un sitio famoso pa local y turistanan awendia.

Pa locual ta e cambio den aparencia, sinembargo, no por a verifica si lo pinta e anker cora back, y segun Doncker ta bisa, aparentemente lo tin un conferencia di prensa prome cu dia 18 di maart pa atende e topico aki.

San Nicolas den preparacion pa celebra 40 aña di Status Aparte

E aparencia nobo di e anker no ta e unico desaroyo cu ta tumando luga den e distrito den e ultimo simannan.

Gobierno a informa den un comunicado publica ayera di e ultimo desaroyonan cultural cu ta tumando luga den preparacion pa celebra 40 aña di Status Aparte y 50 aña di Himno y Bandera. Cu esaki a menciona un mural nobo dedica na artista local Julio Bernardo Euson, ken a representa Aruba internacionalmente y a haya reconocemento riba escenario global.

Segun e comunicado ta splica, e aña aki ta marca un momento ideal pa duna reconocemento na talento local cu ta carga Aruba su nomber cu orguyo riba escenario global. E mural ta situa riba edificio di Chocolate City y ta forma parti di un ambiente cultural mas amplio, e comunicado ta bisa, den cual lo tene exposicion y actividadnan pa subraya e legado di Euson.

Prome minister Mike Eman a señala cu Euson ta un artista di gran importancia pa e isla, a pesar cu mucho kisas no conoce su historia y e impacto cu e tabatin riba nos cultura. “E ta un artista cu a gana mas premio internacionalmente cu cualkier otro Arubiano. Su musica ta forma parti di e alma di Aruba,” el a indica.

E decision pa celebra Dia di Himno y Bandera na San Nicolas tambe ta forma parti di reenforsa Pariba di Brug como centro cultural y historico, specialmente riba Bernardstraat, gobierno a informa den otro comunicado.

Parlamentario Otami Tomasia tambe a enfatisa e importancia di e mural, bisando cu e no mester keda solamente algo bunita pa mira, pero tambe mester forma parti di enseñansa riba nos cultura y historia.

“E personanan aki ta parti di nos historia como isla y como San Nicolas. Nos mester integra esaki den curriculum di nos scolnan. E muchanan mester sa con importante un artista por ta, con Aruba por logra reconocemento mundial y cuanto premio nos a gana internacionalmente. E mural ta importante, pero e historia mester sigui den enseñansa.”

Segun e parlamentario, e proyecto ta simbolisa algo mas grandi: un señal cu San Nicolas finalmente ta haya atencion y inversion despues di hopi tempo di espera. “E iniciativa aki ta bisa cu nos ta pone bida back na San Nicolas y na nos cayanan. Pa hopi tempo San Nicolas tabata wardando pa su beurt. Awo nos ta mira movecion.”

Actualmente e mural no ta cla ainda.

Segun por a mira riba red social, e reaccion di e ultimo desaroyonan aki tabata generalmente bon ricibi pa ciudadanonan. Gobierno tambe a enfatisa cu algun a expresa nan emocion cu San Nicolas lo porfin haya atencion durante e celebracion mas grandi na Aruba. “Tur cos no por ta pabao so. San Nicolas tambe ta parti di Aruba. Duna San Nicolas e oportunidad pa celebra 18 di Maart, ta haci nos sinti plenamente parti di e isla.”

Segun diferente reaccion, e celebracion na San Nicolas no ta cambia e esencia di e fiesta nacional, pero al contrario, e ta expande e sentimento di cultura y hospitalidad. “Si nos kier mira diferencia, nos mester comparti nos cultura. Trece e celebracion akinan cu actividadnan manera mural, canto y proclamacion ta actividadnan hopi positivo. Asina nos ta combina arte cu Dia di Bandera.”

Pues e aña aki ta parce di ta uno particularmente special, unda Aruba lo conmemora y celebra dos evento sumamente importante den nos historia politico, y e biaha aki celebrando e dia nacional den un districto rico den arte, cultura y historia Arubano.

Nota di redaccion: Algun potret ta di Hilario Doncker y Nancy Gallagher riba Facebook.