Reflexion pa aña di Papiamento

Mañan dia 21 di februari ta un dia grandi pa mundo henter den e parti di cultura/idioma caminda cu ta celebra dia internacional di lenga materno.

Na Biblioteca Nacional mañan anochi lo tin un encuentro special cu diferente charla, poesia, musica y mas. Segun Departamento di Cultura, un punto importante pa refleha riba dje e aña aki – declara manera aña di Papiamento – ta pa promove y trata na skirbi esaki cu su ortografia corecto.

E dia internacional di lenga materno ta un celebracion di tur aña organisa por medio di UNESCO den añanan 90. For di e tempo ey caba e interes a cuminsa crece riba loke ta e idioma materno di tur e paisnan. Den cuadro cu esaki, Fundacion Lanta Papiamento hunto cu Departamento di Cultura ta bay tin un anochi cu diferente poesia, charla, exposicion y musica mañan 21 di februari entre 7-9or na Biblioteca Nacional. “Nos kier a haci un invitacion na e compositornan, poetanan, escritornan, pa trata na skirbi e idioma Papiamento den e uzo corecto di ortografia. Y asina ey nos ta motiva esaki pa caminda henter Aruba, grandi y chikito, por siña conoce nos idioma Papiamento skirbi den un bon manera”, Stanley Dabian, relacionista publico di Departamento di Cultura ta bisa Bon Dia.

Ainda tin festivalnan di canto nos dilanti y Departamento di Cultura ta spera cu nos compositornan por pone un strofa den nan cancion dedica na nos himno y bandera, y cu nan por dedica tambe Papiamento como simbolo nacional, pa cuid’e y no lag’e muri pasobra esey ta depende di nos. E aña aki ta bira di tres lustro cu nan a oficialisa Papiamento como idioma oficial banda di otro idiomanan na Aruba.

Papiamento y stranheria
Ultimo nos a tuma nota di algun comentarionan dirigi na hendenan trahando na por ehempel e kiosconan na Oranjestad, tiendanan y otro luganan cu tin basta tempo bibando na Aruba y no ta papia Papiamento.
Na Aruba e hendenan cu bini di afo, specialistanan yudando gobierno of cu ta bin cu trabaonan specifico, tabata sigui lesnan cerca hende priva of via Enseñansa pa Empleo. Dentro di esunnan cu kier haya nacionalidad Hulandes mester siña papia Papiamento, tin conocemento di nos cultura como tambe e idioma Hulandes. Sr. Dabian: “Ta hopi importante pa nos comparti cu e personanan cu ta bin haci Aruba nan di dos cas, pa nan por integra pa nan sa mas di nos idioma. Pa ora nos combersa cu nan, pa por combersa den Papiamento si nan puntra bo pa bo splica nan kico tal cos ta nifica. Y dado momento nan tambe por papia e idioma un bes nan ta residencia y biba akinan.”

Sr. Dabian a sigui splica cu dado momento den tur historia tur caminda bo ta haya cu e ta keda finalmente un escogencia di e persona. Nos lo sigui riba e tema aki cu entre otro e departamento DIMAS pa mira con esaki ta hinca den otro legalmente y kico ta e status pa locual ta nos idioma y stranheria.

 

Simbolo di identidad
Manera conoci, for di 21 di mei 2003, nan a oficialisa Papiamento como idioma, banda di e idioma Hulandes, caminda bo por skirbi carta na gobierno of instancianan oficial den idioma Papiamento. Tambe for di 2003 e idioma a drenta scolnan bao di e buki di Cristal. Tin investigacionnan haci na Europa cu a constata cu for di ora bo ta wordo forma como baby den matriz di e mama, e baby ta sinti y haya cierto encuentro cu loke ta e idioma materno. 60 hende a wordo studia/analisa di cual ta comunidad Frances y Aleman, anto a constata tambe cu e muchanan tabata tin e parti di e accento di e idioma cu a haci influencia riba dje di biaha. “Kiermen ta hopi importante pa nos aprecia nos idioma materno y respeta esaki. Busca pa sa mas y mas di e bon uzo di e ortografia tambe pa asina ey bo por ta orguyoso di bo idioma materno. Cu ta e vehiculo y tambe simbolo di identidad di un pueblo,” sr. Dabian ta expresa.

Nan ta uza Papiamento hopi mas di locual hopi hende kisas ta kere segun sr. Dabian y den tur manera; combersando cu otro, skirbi den medionan di comunicacion, bukinan, blogs, pues mester percura pa promove y ta orguyoso di esaki. E transcendencia di 1976 caba, e tempo ey nan a oficialisa e idioma pa gobierno anto mas y mas comision a bin pa traha riba e lista di palabra y yega na un totalidad di e bon uzo di ortografia di Papiamento.