Apertura di Aña Parlamentario sin varios minister

Manera nos a informa anteriormente, e apertura di aña parlamentario e aña aki no tabata tin e conoci desfile militar. Esaki relaciona cu asistencia cu nan a bay duna na St. Maarten. A sigui cu e reunion solemne cual tabata uno hopi trankil y simpel. E gabinete no tabata completo: ministernan di Financia y Enseñansa no tabata presente.

E tabata e prome discurso di Alfonso Boekhoudt como gobernador y e tema central den e discurso tabata e 17 meta di desaroyo sostenibel (lesa mas riba pagina 30 den e edicion aki). Den e audiencia publico, cual no tabata uno mucho grandi, tabata tin un klas di Scol Dunun man presencia e apertura. Despues e ceremonia presidente Mervin Wyatt-Ras y tambe prome minister Mike Eman y e resto di e gabinete a sali lihe y no a duna prensa manera añanan anterior oportunidad pa haci pregunta. Aki bou reaccionnan di entre otro e lidernan di fraccion di MEP y AVP.

Marlon Sneek(AVP): ‘Un aña parlamentario hopi exitoso’
Pa AVP segun lider di fraccion Marlon Sneek ‘e aperrtura di e Aña Parlamentario tras di lomba nos mester bisa a bay bon’. E ta conta cu tabata un apertura caminda cu sigur como parlamento nan a haci diferente cos como instituto. Un di e logronan cu sr. Sneek ta subraya ta cu parlamento awe tin su mesun radio y por wak atras na un aña cu a atende cu diferente ley importante. “ En todo caso pa mi persona sigur mirando cu tabata un aña cu mi a presenta tres ley di iniciativa di mi persona cu a wordo acepta den e aña parlamentario ey. Y sigur si mira e perspectiva cu nos gobernador ta trece pa locual ta e aña parlamentario nos dilanti, nos mester bisa cu ta uno cu nos kier yega. Cu nos ta kere den sostenibilidad cu no ta solamente den e caso aki e parti berde/energetico, pero con bo ta inverti tambe den bo medio ambiente den su totalidad.”

Evelyn Wever Croes(MEP): ‘Parlamento a faya den su control’
Dialuna tabata tin un reunion publico na parlamento den cual nan a pasa bek riba e aña parlamentario 2016-2017. Lider di fraccion MEP Evelyn Wever-Croes ta conta Bon Dia cu loke el a trece pa dilanti ta cu e aña aki, parlamento a faya den su control. E prome cos ta e tema di combati corupcion. E mayoria den parlamento a acomoda corupcion den ley, e ta bisa. E ta referi na e ley di iniciativa unda cu un minister bao investigacion ta keda cu su funcion te ora cu su caso yega corte anto tin un veredicto. Cual por dura hopi aña. Eynan e fraccion mayoritario cu ta AVP den parlamento a perde un oportunidad grandi den cual nos como parlamento por a mustra cu di berdad nos kier combati corupcion, segun sra. Wever Croes.

Marisol Lopez Tromp: ‘Reunionnan importante no ta tuma luga’
Parlamentario independiente pero awor riba lista di POR sra. Tromp ta bisa Bon Dia cu despues cu su persona a dirigi parlamento tres aña, a nota un cambio hopi grandi den forma con ta yama reunion.
El a comenta riba hopi reunionnan cu a wordo pidi y ultimamente cu segun e ta reunionnan importante pa pais Aruba cu ainda no a wordo yama. “Ta importante pa yama no solamente e leynan cu tin cu wordo trata, pero tambe topiconan cu ta regarda henter pais Aruba. Manera por ehempel e reunion publico cu sr. Bikker y mi persona a pidi tocante minister president pa duna cuenta riba un minister deteni cu keto bay tin su funcion y salario sin cartera.”

Sra. Lopez Tromp ta pensa cu e reunion aki ta uno importante pa yama no pa motibo di e persona, pero pa e situacion cu esaki ta crea hunto cu e imagen cu e ta duna Aruba. “Nos ta exigi na presidente di parlamento pa yama e reunionnan aki, pero nan no ta sosode. Na momento cu bo ta un presidente di parlamento e ta pa henter e parlamento, no solamente e fraccion cu bo ta sostene. Mi ta kere cu a pesar cu tin campaña politico, akiden trabao tin cu sigui.”

Un di e reunionnan cu e parlamentario a enfatisa riba dje tambe ta esun di protector di pueblo, cu ta un ley cu tin un aña cla caba, wardando riba tratamento.

You May Also Like

Meter pre-pago pa famianan den necesidad cu no tin awa y coriente

Gobierno a bin cu un solucion pa atende cu e problema social di cantidad ...

6july,SL, beach policy (1).jpg

Instalacion di boei den lama

Manera ta conoci, ya pa algun aña ta trahando riba e Beach Policy conhuntamente ...

Ear plugnan ta keda necesario durante carnaval

Den cuadro di temporada di carnaval 64, Quota Club Aruba ta haci un yamada ...

ahata 2.jpg

AHATA: sosteniendo peticion Minister di Husticia pa mas fondo pa siguridad

AHATA, e asociacion di sector hotelero, ta preocupa cu e aumento recien den actividad ...

Fraccion AVP (2).jpg

Fraccion AVP no ta laga pasa e asunto di nombracion gobernador ‘sin mas’

E fraccion AVP, e partido den gobierno, no ta laga pasa e asunto di ...

InselAir ta corta den su vuelonan

InselAir ta anuncia cu nan ta corta den nan vuelonan pa asina facilita e ...