For di 23 te cu 25 di augustus 2021 na Boneiro ta tumando luga e Reunion Interparlamentario di Reino (IPKO) entre e parlamentonan di Hulanda, Corsou, Sint Maarten y Aruba.

Manera semper Parlamento Hulandes ta anfitrion di e IPKO den zomer. Despues cu e ultimo dos edicionnan (di zomer 2020 y winter 2021) a tuma luga den forma virtual, e biaha aki e situacion a permiti pa e parlamentarionan topa atrobe fisicamente den Caribe Hulandes. Semper teniendo cuenta si cu e medidanan valido pa cu COVID-19.

E reunion a cuminsa dialuna 23 di augustus cu e reunion plenario presidi pa miembro di Tweede Kamer y presidente di e comision fiho pa relacion den Reino, Sr. Jan Paternotte.

Na cuminsamento Gezaghebber di Boneiro, Sr. Edison Rijna, a yama e parlamentarionan bon bini na Boneiro. Despues di esaki e cuater delegacionnan a duna cada un un presentacion tocante e desaroyonan recien na nan pais. Tambe nan a intercambia riba e desaroyo di e eleccionnan na Hulanda, Corsou y Aruba y tocante e organisacion di e proceso electoral.

Awe mainta dia 24 di augustus lo discuti plenariamente y den grupo riba miho relacion y alabes relacion duradero dentro di Reino. Lo toca tema manera igualdad, comunicacion, diversidad, e Statuut, derecho humano, estado di derecho y bon gobernacion y ayudo y asistencia mutuo. Despues lo debati mas profundamente riba e acuerdonan di cooperacion actual y e ehecucion di e paketenan nacional (landspakketen) cu tin cu cada pais. Parti di atardi lo intercambia tocante clima y sostenibilidad. Esaki lo tuma luga a base di diferente di e metanan di desaroyo sostenibel (SDG’s).

Diaranson dia 25 di augustus parti di mainta e delegacionnan lo haci un bishita na Parke Nacional Washington Slagbaai. Lo informa nan tocante conservacion di naturalesa riba tera y den lama rond di Boneiro. Atari lo sigui e lista di palabracion di IPKO y e conferencia di prensa.

E delegacion Arubiano ta consisti di:

Señor mr Edgard. G.A. Vrolijk, Voorzitter der Staten en delegatieleider

Señor Rocco G. Tjon, Voorzitter CKABB (M.E.P.)

Señor Hendrik W.G. Tevreden (M.E.P.)

Señor Endy J.H. Croes (M.E.P.)

Señor Arthur Vallejo (M.E.P.)

Señor Geoffrey B. Wever (RAIZ)

Señor mr Arthur L. Dowers (A.V.P.)

Señor mr dr. Ryçond R. Santos do Nascimento (A.V.P.)

Señora Gerlien L. Croes (A.V.P.)

Señora Marisol J. Lopez-Tromp (MAS)

Señor Miguel J. Mansur (ACCION21)

Señor Herman C.J. Hek (Griffier der Staten van Aruba).