Regularmente, lectornan ta acerca mesa di redaccion di Bon Dia Aruba pa expresa nan frustracion cu cierto ciudadano cu ta apropia di espacionan publico como si fuera nan ta priva. Pa motibo cu autoridadnan no ta tuma accion contra e actonan asocial aki, e tendencia di espacionan publico cu ta ser privatisa ta continua.
Un lector a comparti cu na Mangel Halto, tin cierto cas ta cera e beach dilanti di nan propiedad, haciendo esaki inaccesible pa publico. Ademas di cera e area cu palo, ta pone lounge chair haciendo e espacio mustra como si fuera ta un espacio priva. Tampoco ta aceptable pa laga stoel priva poni riba espacio publico cu expectativa cu cualkier otro hende no mag di us’e.
Manera Bon Dia Aruba a yega di publica den pasado, e tema di beachnan publico y hendenan cu kier purba “privatisa” e beachnan aki pasobra nan ta cerca di nan cas of negoshi ta un tema cu ta andando pa hopi tempo caba. Cada biaha ta bin dilanti diferente situacion cu ta ilustra e falta di respet pa leynan di Aruba, y e apropiacion di espacionan publico.
Manera menciona caba, na Aruba tin e ley ‘Landsverordening openbare wateren en stranden’ (Ordenansa nacional awanan publico y beach) cu ta stipula cu tur lama na Aruba ta publico. E ley ta dicta: “den e ordenansa aki y e disposicionnan basa riba dje ta compronde cu awa publico ta awa cu ta accesibel na tur, limita of no, den virtud di normanan di derecho publico.”
Sinembargo, pa motibo di falta di control y aplicacion di ley, situacionnan asina ta sigui presenta.
