Riba diahuebs dia 7 di april ultimo a tuma lugar e ceremonia di firma durante cual Aqualectra NV y Eagle LNG Partners LLC a firma un Heads of Agreement, haciendo esaki e prome stap pa negociacionnan riba un suministro di gas duradero cual Aqualectra ta bay usa pa fuel e produccion di awa y coriente na Corsou.

E periodo di negociacion ta proyecta pa keda finalisa pa mita di aña, y despues cu a adkiri tur permiso necesario, ambos partido ta bay continua cu e desaroyonan cu ta bay haci suministro di gas pa Corsou posible. Esaki, segun un comunicado di prensa, ta bay resulta den costonan menor di produccion y mantencion, cual ta nifica prijs mas abao pa electricidad y coriente pa pueblo di Corsou.

E Heads of Agreement a keda firma pa CEO di Aqualectra NV, Sr. Darick Jonis; y Sr. Filipe Pinto, vice presidente di desaroyo comercial di Eagle LNG Partners LLC. Esaki a tuma lugar den presencia di minister di Desaroyo Economico, Sr. Ruisandro Cijntje; consul general di Merca basa na Corsou, Sra. Margy Bond; y partnernan afilia como tambe stakeholders.

Sr. Pinto a bisa: “Eagle LNG ta agrada di desempeña un rol significante den transicion di Corsou na energia mas limpi, mas stabiel y dependiente, specialmente durante e temporadanan aki di incertidumbre unda no mester asumi cu ta bay tin disponibilidad y accesibilidad. E transicion na gas natural riba e bunita isla aki ta pone Corsou riba caminda pa un ‘zero-carbon footprint’, un caminda acelera pa boso transicion na gas natural pa generacion di energia.’

E Heads of Agreement ta resultado di un periodo extenso di tempo durante cual Aqualectra a investiga e oportunidad pa fuel e produccion di energia na Corsou mediante gas. Durante 2021, Aqualectra a ricibi propuestanan no obligatorio di varios proveedor di LNG. Basa riba esaki, Aqualectra a duna un ‘Request for Informacion’ oficial pa crea un campo igual y transparencia, unda companianan por entrega nan propuestanan completo basa riba e solicitud di Aqualectra.

Despues di ricibi cinco propuesta no obligatorio, Aqualectra a compara e opcionnan y a continua su investigacion cu dos compania como preferred bidder. Na final, a scoge Eagle LNG Partners LLC como e compania preferi cu Promigas S.A. E.S.P. como e segundo oferta preferi pa suministra LNG na Corsou. Un posible colaboracion entre Aqualectra NV y Eagle LNG Partners LLC por trece gran singergia, ya cu actualmente Eagle LNG ta ofrece su servicionan na Aruba tambe y otro islanan den Caribe, cu ta crea un brug entre Aqualectra y management di Utilities na Aruba pa colaboracion futuro entre e dos pais como tambe otro islanan bisiña aplicando LNG y fuentenan di fuel principal pa generacion di electricidad.

Segun e comunicado di prensa, esaki ta otro stap importante di Aqualectra cu ta bay duna forma na e futuro provision di energia na Corsou mediante desaroyonan innovativo y duradero cu ta bay beneficia Corsou.