Vakantie den exterior di Argentinonan cu por paga pa esaki a bira 30% mas caro, cu e aprobacion di e ley nobo di solidaridad social di Gobierno di Alberto Fernandez y, cu zomer cerca, esun cu kier bay, mester adapta mientras ta prepara nan maleta.
E ley publica na Boletin Oficial e siman aki ta conta cu un 30% di aumento den compra cu moneda stranhero, e pasashi di avion internacional, como tambe adkisicion di divisa stranhero, e cual ta uza durante biahenan den exterior y pa spaar, na un pais unda e mayoria di e poblacion ta warda placa na dollar.
E impuesto aki a haya e nomber di ‘PAIS’, sigla cu ta coresponde “Pa un Argentina Inclusivo y Solidario”, y tin un vigencia di 5 aña.
E presidente di e consultor Singerman Makon, Pablo Singerman, a splica den un entrevista cu ta un impuesto ‘cu ta cay malo’ den e clase media principalmente, pa motibo cu nan ta esun cu mas ta biaha, pero cu ta bin motiva pa un situacion economico ‘extremadamente critico’, ya cu ‘no tin dollar’ pa cubri e demanda di divisa stranhero di e Argentinonan.
E impuesto ta afecta un sector cu tabata den contraccion for di e di dos devaluacion grandi cu a sosode desde 2018, bou presidencia di Mauricio Macri (2015-2019).
Entre januari y october di 2019, casi tres miyon y mey di Argentino a biaha p di e pais, un caida di 12,1% compara cu e mesun periodo di aña 2018, segun Instituto Nacional di estadistica y Censo (Inec).
