“Tin estudionan cu ta indica cu maranan (gang) ta activa nan celnan na e provincia di Buenos Aires. Y mas importante, den e caso aki, ta e Mara S13, tambe conoci como Salvatrucha. E gang aki a logra constitui un corporacion criminal y economico den scala grandi”, a revela Alejo Campos, un director di Crime Stopper na Guatemala.
Esey tabata e contexto di e di 5 reunion di Asociacion Latinoamericano contra Contrabando (ALAC) na San Jose di Costa Rica.
Algo di e presencia posibel di e grupo aki a ser conoci na 2016, ora polis a haci un operativo pa desarticula gruponan di narco di La Matanza. Na e momentonan ey, a detene algun integrante di e banda Centroamericano aki. Pero despues di esey no tabatin mas noticia; e tema a permanece den un silencio informativo, cu te e dianan aki t’ey.
Crime Stopper, un ONG cu desde Guatemala ta proyecta pa tur America Central, ta experto den e estudio di e gang aki cu, manera Campos ta describi, a stop di ta e ‘pandillero violento’ Guatemalteco, Hondureño y Salvadoreño, pa converti den organisacion criminal cu ramificacion internacional: “Nan ta presente na Europa y Australia”, Campos a revela.
El a adverti cu e fenomeno di Maras cu a desaroya den e triangulo nort di Centro America (Guatemala, El Salvadory Honduras), unda nan ta mas consolida, ta proyecta cu ‘sucursal’ na Europa y Australia.
E Maras Centroamericano tin fuente di ganashi multiple. Por ehempel, awe nan ta financia nan mes mediante extorsion cu ta victimisa e comunidadnan cu ta biba na teritorionan controla pa nan. E extorsion aki ta eherce riba sector humilde cu mester aporta pa e Mara un contribucion pa luna, pa e simpel hecho cu nan ta habita den e colonia. Cu e placa ey, e organisacionnan aki ta cumpra linea di busnan y taxi. Y nan a instala restaurant popular, na mesun momento cu nan ta mantene e red di tienda unda nan ta bende producto exclusivo, cu nan ta trece di contrabando.
