Importacion di mata y producto di mata na Aruba ainda no ta regula, a pesar di intentonan di parti instancianan publico. Consecuentemente, no tin un maneho structura pa evita cu por drenta plaga y peste cu ta afecta tanto e matanan no-nativo importa pa embeyecemento y e flora endemico.

Paisnan manera Merca, y Hulanda como parti di Union Europeo tin e control aki ancra den ley y maneho, y ta aplica esakinan pa proteha nan agricultura y ecosistemanan di pestenan invasivo, patogeniconan di mata y otro. Locual e paisnan aki ta haci ta regla e importacion pa medio di inspeccion di e carga na pais di origen, pa percura cu no tin peste, ta exigi declaracionnan pa ilustra di unda e matanan ta bin originalmente, y tin un lista di matanan prohibi, cu ta mara importadonan na pidi permiso prome cu e producto subi carga.

Ta for di decada di 90 cu Departamento di Agricultura, Cria y Pesca ta urgi Ministerio pa Asuntonan Economico pa introduci un ley fytosanitario den cuadro di e areglo LGO. Asina e proposicion cu DLVV a presenta na Direccion Legislativo ta ilustra. Manera ta conoci, ainda Aruba no tin un maneho fytosanitario, cu ta e control riba importacion di mata y productonan vegetal y fruta, pa evita importacion di especienan invasivo, particularmente plaganan.

Den decada di 90 Aruba a pidi participacion na e tratado CITES y e maneho di control riba animalnan a bira ley, bou encargo di Servicio Veterinario. E mesun decision a duna DLVV e autoridad administrativo y cientifico pa CITES pa loke ta flora. Basa riba e landsverordening relevante, Gobierno a considera cu ambtenaarnan di e departamento lo tabatin e experticio specifico necesario pa carga e tarea di autoridad cientifico y DLVV den su plan di maneho na 1999 a lanta un servicio fytosanitario cu e intencion pa investiga e pregunta si permisonan otorga den cuadro di CITES na cumpli cu condicionnan. Pa por exporta producto di Aruba pa Europa por ehempel mester cumpli cu condicionnan fytosanitario. E proceso pa realmente concretisa e trabounan sinembargo no a conclui y riba dje, a bin hasta un peticion pa laga Minister di Husticia encarga cu e ley riba control fytosanitario, y na 2008, e foro di WildAruba a recomenda Gobierno di Aruba pa lanta un ekipo specifico pa combati especienan invasivo.

Aunke cu nunca a pasa e ley finalmente, DLVV a participa si nan diferente reunionnan regional riba fytosanidad, entre otro bou auspicio di e Caribbean Agricultural Health and Food Safety y World Trade Organization, particularmente den luz di e pestenan manera Giant African Snail, Red Palm Mite, Muscanan di Fruta y Palm Pest Complex. A identifica e laboratorionan regional pa identifica e pestenan y tambe pa mira con pa sincronisa e leynan. Un di e resultadonan di e reunion tabata cu a ricibi asistencia tecnico pa atende cu e Red Palm Weevil y e Mediterranean Fruit Fly. Na 2020 DLVV a compila un lista di pestenan di agricultura cu ta presente na Aruba.

Proteccion di mata ta encera tur medidanan di agricultura y legislativo cu tin e meta di proteha e cosecha contra malesa y plaga di mata. Bou di e definicion aki hende ta compronde medidanan di sanidad of di cultivo, e uso di variedadnan resistente, combatimento fisico of quimico, biologico of un combinacion di dos of mas metodo.

Por lo general tin poco documentacion na Aruba riba e problema di introduccion di exoticonan, e consecuencianan general cu nan introduccion riba biodiversidad terestre y riba manera efectivo den limita e especienan invasivo aki.

E intentonan di DLVV pa establece maneho fytosano tabata pa amplia e area di produccion di agricultura, pa asina baha e dependencia riba importacion di alimento, y asina mehora calidad di e produccion y amplia e variedad di fruta y berdura.

Hunto cu e maneho di control tambe mester tin un miho maneho riba tereno cu ta adecuado pa agricultura y cria. Na 2009, Direccion di Infrastructura y Planificacion, DIP, a mustra cu tin mas o menos 700 parcela di tera, como 8 kilometer cuadra, cu tabata na huur. E tempo ey, 60 porciento tabata bou di cultivo permanente of pa e practica di cria, particularmente den e area cerca di Butucu y Parke Nacional Arikok. Censo di 2010 a constata cu unicamente 267 ciudadano tabata practica agricultura.

Den e intencionnan pa establece un servicio fytosanitario, DLVV a mustra na 1999 cu mas hende ta realisando cu malesanan di mata por forma un costo cu por afecta e viabilidad di produccion di e sector primario na Aruba. Un manera pa baha introduccion di plaga y pa unda cu por reduci presencia di organismonan dañino ya estableci na Aruba ta pa medio di pone reglanan di importacion di productonan di mata. DLVV tabata purba pa mira si esaki tabata posibel pa medio di e Landsverordening In-en Uitvoer, pero despues mester a avisa e Minister concerni cu e ley aki no tabata duna e espacio aki. E ley di proteha naturalesa, esta e Natuurbeschermingsverordening di 1995, pa medio di e splicacion di e ley (Memorie van Toelichting) ta splica den su introduccion cu proteccion di ecosistemanan di Aruba ta di suma importancia. E splicacion ta elabora cu e presencia di un flora y fauna varia y atractivo ta bon pa turismo, cu ta y lo keda e pilar economico primordial pa desaroyo economico di Aruba. E presencia di e Red Palm Weevil como tal tabata considera como un peste cu un impacto specifico riba e pilar economico di Aruba, ya cu e insecto a afecta e palmanan como parti di embeyecemento di paisahe, manera Dadel y otro. Un maneho fytosanitario lo a preveni esaki, algo cu hopi importado di container di mata no tabata sostene, segun e nota di DLVV. Hopi a campaña contra regulacion.

Sinembargo, rond Caribe e enfoke ta mas bien pa mara regulacion y control pa mehora siguridad di cuminda y proteccion di medio ambiente unico. E ta cuadra tambe cu e decision di institucion di DLVV pa contribui na procesonan di anti-erosion.

E intencionnan di maneho di DLVV di 1999 ta papia di pone reglanan tocante di organismonan dañino na importacion di productonan di mata. Sinembargo especienan

invasivo por drenta Aruba tambe por medio di importacion di productonan di animal. Asina biologonan ta kere cu e boa a yega Aruba por medio di e comercio di bestia di hobby. Leynan veterinario ta regula entrada di pestenan di bestia pero si despues e doño laga esakinan bay mondi no tin control. En general ta asina tambe cu plaganan di mata.

Pa DLVV por ehecuta e trabou di control manera e ta rekeri na Hulanda of Merca, of hasta segun rekisitonan Caribense pa salud fytosanitario na cua ta afilia, mester di regla y leynan pa permiti control, ekiponan pa test y autoridad pa actua. Mas ainda, lo mester inverti den capacidad humano pa haci e control y espacio pa cuarentena di matanan. E ta rekeri inversion di Gobierno.