Despues cu diadomingo ultimo, Wardacosta di Region Caribe mediante un comunicado di prensa a informa tocante un catamaran cu a perde mientras e tabata nabegando den direccion di Aruba, medionan Dominicano a reporta cu armada di Republica Dominicana a duna asistencia na e catamaran en cuestion despues di un incidente den awanan di Lama Caribe.

Diadomingo, Wardacosta Region Caribe a informa cu diaranson anochi, siman pasa, Centro di Operacionnan Maritimo (MOC) di Wardacosta a ricibi un informe cu un boto cu dos persona abordo ta perdi riba lama. E dos homber, un Mericano y un Hondureño (identifica den algun medio como di nacionalidad Frances), a sali for di Republica Dominicana rumbo pa Aruba diamars atardi y no a yega, segun e comunicado di prensa.

Despues di a ricibi e informe diaranson anochi, Wardacosta, debi na e ora di anochi y e visibilidad limita, a desplega e avion di Wardacosta pa e buskeda e siguiente mainta na salida di solo. A base di e ruta di boto specifica, MOC a identifica e area di buskeda y a manda e avion pa busca. E buskeda pa e boto cu a perde y e dos homber abordo a dura un total di tres dia, pero no a duna resultado positivo.

Wardacosta a transmiti tambe mensahenan di NAVTEX y UMIBS pa botonan cerca di e area di buskeda, pero esaki tampoco no a duna ningun informacion adicional di e boto perdi of e dos homber.

Pa e motibo aki Wardacosta a dicidi di termina e buskeda activo. Wardacosta a indica cu durante patruyanan regular di Wardacosta lo keda extra vigilante den e proximo dianan, buscando e boto perdi y tambe lo sigui vigila e situacion. E centronan di rescate y coordinacion den e area di buskeda tambe ta na altura di e boto cu ta perdi cu su dos tripulante.

Sinembargo, medionan Dominicano, manera De Ultimo Momento y CDN37, a reporta cu Armada di Republica Dominicana a informa cu a duna asistencia maritimo na un boto tipo catamaran di bandera internacional, despues cu a registra un incidente como 80 miya nautico sur di La Romana, den awanan di Lama Caribe.

Segun e reportahe oficial, autoridadnan naval a atende e situacion di emergencia di manera rapido y oportuno. Unabes cu a ricibi e alerta, unidadnan di Armada a activa inmediatamente e protocolnan di buskeda y asistencia, desplegando personal y recurso pa localisa e boto, segun medionan Dominicano. Danki na e coordinacion y respuesta rapido, miembronan di Armada Dominicano a logra ubica e catamaran den coordinadanan specifico di Caribe, y asina duna e asistencia necesario pa salvaguardia bida di su ocupantenan y garantisa seguridad maritimo.

Den un comunicado di prensa, Armada di Republica Dominicana a reitera su compromiso cu proteccion di bida humano riba lama, y a resalta e importancia di vigilancia permanente den awa hurisdiccional y zonanan di interes, como tambe cooperacion cu botonan di bandera internacional dilanti cualkier situacion di emergencia.

Autoridadnan Dominicano ta continua cu investigacion y evaluacion corespondiente pa determina e causa di e incidentenan y por ofrece mas detaye.