Despues di un periodo di 5 aña, ZiGGi Recado ta lansa su cantica titula “Got my heart”. Un cantica di ‘reggae/dancehall’ cu sigur lo keda gusta pa tur cu ta scucha e genero aki. Esaki ta prome di 8 cancion cu e artista aki ta preparando pa lansa.

Cuminsando 7 di october el a lansa 1 cantica tur diabierna pa 8 siman largo. Cada cantica lo keda compaña pa un ‘visualizer’, dunando tur tema un toke visual extra artistico.

ZiGGi Recado (Rotterdam, 1981), canta-autor y productor di muziek, a crece y biba na St. Eustatius for di su prome te cu su 12 aña. Despues el a muda pa Aruba pa atende Colegio Arubano y na 1999 el a regresa pa Hulanda pa continua su estudio na Rotterdam. Dor di su amor pa muziek, semper e tabata rondona di personanan musical. Esaki a pone cu den corto tempo el a drenta studio di grabacionysigui desaroya su mes musicalmente.

Na 2008 el a lansa su albùm titulá “In Transit”, e album aki ta kontené e hit mundial “Need to tell you this”, cual ta e cantica cu a duna ‘ZiGGi Recado’ reconocemento internacional.

Despues cu su carera musical a sigui progresa el a presenta riba diferente escenario di festivalnan grandi manera Sziget (Hongaria), Reggae on the River (Kalifornia), Lowlands (Hulanda) y Summerjam (Almenia). Tambe el duna concierto den paisnan manera Portugal, Suesia, Fransia, Sudan, Cabo Verde, Colombia, India y hopi mas. Tur esaki combina cu hitnan manera “Gonna Leave”, “Mary” y “Blessed”, ta prueba cu ZiGGi Recado ta un artista di ‘reggae’ di taya.

Loke ta haci ZiGGi Recado su proyecto nobo asina special, ta cu el a produci, skibi y graba tur cantica aki na Corsou. E grabashonnan pa su 8 ‘visualizers’ tambe a ser graba na Corsou en colaboracion cu de Castro Studios. Banda di e proyecto aki, nos ta anuncia cu ZiGGi Recado lo tene su prome concierto na Corsou den e lunanan binidero.

Esaki lo ta un evento unico. Mas detaye lo sigui asina cu fecha y localidad ta confirma. ZiGGi Recado y su team ta entusiasma pa comparti su proyecto nobo cu pueblo di Corsou y ta sumamente gradicido pa tur e inspiracion cu e bunita isla di Corsou a brinda su persona durante di su estadia aki. E ta spera cu su muziek lo yega na curason di un y tur.