The Chaz Modeling & Talent School recientemente a manda cuater representante pa evento International Agnes Universe organisa na Puerto Plata Republica Dominicana. E representantenan a haci un tremendo trabao pa e isla di Aruba logrando diferente titulo internacional.
E anochi final di Festival di Talento y Belleza Internacional 2022, Agnes Universe por a disfruta di un bunita y tremendo presentacion di nos muchanan cu sigur a saca cara pa nos isla. Annabell Bislip a logra e corona maximo den su categoria na unda su beyesa y su talento a resalta. El a wordo corona como Little Beautiful Universe 2022. Thaheely Geerman Mini Model Aruba a keda como Primera Finalista Mini Model Universe y a Gana Trahe Fantacia. Maya Gordon Pre-Teen Model Aruba a sali Primera Finalista Pre-Teen Model Universe. Tanique Chan Miss Teen Model Aruba a sali Miss Teen Tropical y tambe miho trahe Fantasia.
Nan a regresa Aruba riba Diaranson 13 di Juli truinfante cu tur nan titulonan. Sigur hopi portanan lo habri pa e participantenan aki cu a sa di demostra hopi talento y entusiasmo, cu un futuro hopi briyante nan dilanti. Tin di remarca cu tur e modelonan ta participa den un evento asina pa prome biaha na un nivel internacional. “Nos di Chaz Modeling & Talent School ta sumamente orguyoso y contento cu e presentacion cu nos alumnonan a duna y nan mayornan cu a duna hopi dedicacion na e muchanan.”
The Chaz Modeling & Talent School kier a gradici Rina’s Flowershop pa e bunita bouquettenan cu nan a ricibi na entrada, tambe tur hende y instancia cu di un of otro manera a yuda e participacion di nos muchanan na Republica Dominicana. E no tabata un certamen facil segun Chaz Modeling, pero nan a sa di representa Aruba dignamente cu hopi orguyo y duna un tremendo presentacion internacional.
