Scol di Teatro Aruba TRIBI ta un scol di teatro nobo na Aruba cu tin como meta yuda mucha y hobennan desaroya den tur aspecto di teatro. Durante un conferencia di prensa pa anuncia e scol nobo aki, Daylan Krozendijk hunto cu Joan Danies ta elabora ariba con e idea a nace y kico e metanan di e scol ta.
Daylan Krozendijk ta un docente di teatro na IPA y ta director artistico di Scol di Teatro Aruba TRIBI. El a conta cu el studia pa docente di teatro na Hulanda na Hoge School voor de Kunsten Utrecht y despues el a bin Aruba di biaha pa traha den su ramo.
El a conta cu durante su estudio caba e tabata bezig ta wak cuanto posibilidad tin di teatro y semper e tabatin e deseo pa trece esey na Aruba pa e comunidad, hoben y muchanan di Aruba.
Krozendijk a sigui conta cu e idea pa lanta e scol di teatro nobo a nace di Fundacion Prins Bernard Cultuurfonds Caribiesch Gebied pasobra nan a cuminsa ripara cu no tabatin hopi peticion ta bin pa nan instancia pa e area di teatro na Aruba.
El a indica cu Fundacion Prins Bernard Cultuurfonds Caribiesch Gebied ta traha hopi bon cu un scol di teatro na Corsou y nan a duna e scol aki e tarea pa bin Aruba y wak kico ta pasando cu e mundo di teatro y dicon nada no ta wordo haci.
Asina e scol di teatro di Corsou a bin cu un proyecto di arte na Aruba titula “20 hours of Theatre” unda cu nan a uni tur e hendenan di teatro y tambe algun hoben pa traha riba produccionnan.
“Asina mi a yega den contacto cu e scol y eynan e iniciativa di mi mes a yega na combesacionnan hey, que hubo nos cuminsa cu un scol di teatro na Aruba pasobra ta algo cu no tabatin algo structural na Aruba cu ta duna lesnan di teatro. Asina e idea a nace y nos ta cla pa anuncia pa prome biaha e scol di teatro,” Krozendijk a remarca.
El a subraya cu aunke su persona a inicia e proyecto aki, den e proceso el a ripara cu ta indispensabel pa tin e apoyo di Joan Danies den e proyecto aki y asina nan a yega na un palabracion pa e uni na e ekipo.
Joan Danies ta docente di CKV na EPI y specialisa den e ramo di teatro. Su funcion pa Scol di Teatro Aruba TRIBI e director di negoshi (zakelijke leider).
El a splica cu nan a cuminsa traha cu studiantenan di scol na Aruba pa wak si di berdad esaki ta algo necesario y e ta necesario.
Danies a resalta cu e metanan di scol ta hopi importante ya cu e ta un scol di teatro y pa Aruba e ta algo grandi.
El a enfatisa cu e meta importante ta pa desaroya e hoben y lag’e siña expresa su mes den e disciplina ki. El a agrega cu esey no kiermen cu otro disciplina no ta importante, pero teatro ta duna un desaroyo mas amplio.
“Semper nos ta bisa ora bo ta un actriz, ora bo ta un actor y bo ta para riba stage, bo ta actuando para pa un publico grandi cu ta mira bo. P’esey hustamente awe nos scol TRIBI ta cuminsa sali cu loke nos ta yama “The Theatre WarmUp”,” el a bisa.
E prome actividad aki di e scol di teatro ta consisti di nuebe encuentro di cual shete ta bay ta e lesnan, un dia di training general y otro dia di presentacion. El a menciona cu e presentacion ta specialmente pa e mayornan por mira kico nan yiunan a haci durante di e lesnan.
Krozendijk a resalta cu loke ta distingui Scol di Teatro Aruba TRIBI di otro instancianan cu ta duna les di actuacion, ta cu nan scol ta bay enfoca riba teatro den tur su faceta y aspectonan. “Tin por ehemplo e uso di luz, e uso di curpa, costume, shmink, tin diferente forma di teatro. Teatro ta asina grandi y p’esey tambe e no ta un scol di actuacion, e ta un scol di teatro y e mucha y hobennan ta bay siña tur e disciplina di aspecto di teatro,” el a enfatisa.
