Ayera mainta a tuma luga e parada escolar di Oranjestad pa celebra carnaval 70. Un parada yen di ambiente, alegria y hopi creatividad na unda e muchanan, como tambe e mayor- y maestronan a disfruta te na final.
E aña aki, compara cu aña pasa, e participacion den e parada escolar tabata mas grandi, pues mas scol a uni na e celebracion aki.
Otro cambio ta cu e aña aki e parada escolar a wordo organisa pa SMAC mes. E organisacion a tuma e iniciativa y a reuni cu e diferente scolnan pa asina organisa un solo gran parada escolar na Oranjestad.
Ayera a toca turno na e scolnan preparatorio y basico. Un total di 12 scol a participa den e parada na unda cada scol a luci cu diferente tema y creatividad a resalta. E parada a sali for di Veld di Cricket, a drenta DeSallestraat, despues Kamerlingh Onnestraat pa asina termina na veld di RCA.
