Minister di Salubridad Publico, Dangui Oduber a referi na e situacion cu a surgi mundialmente, despues cu Organisacion Mundial di Salud (WHO) a alerta riba e Novel Coronavirus cu a keda detecta na Wuhan (China).

A pesar cu tin cantidad di informacion internacional circulando rond, e mandatario a bisa cu e intencion no ta di crea panico of ‘crea sensacion.’ E ta duna tur credibilidad na WHO cu ta un instituto ‘renombra y responsabel.’ Igualmente den bon coordinacion entre departamento di Salud Publico (DVG), e ta haya cu mester existi un comunicacion habri pa suministra informacion pa prensa local.

Capacidad y recurso.
E mandatario a bisa cu Aruba ta sigui e desaroyo aki di cerca, mirando cu nos ta un isla turistico. Tambe Aruba lo sigui tur recomendacion cu WHO lo bin cune. Igualmente el a laga sa cu como pais, nos tin capacidad y recurso pa detecta si un eventual caso lo presenta na Aruba. “Nos tin e capacidad y nos tin e tecnologia pa haci e tipo di test aki y pa constata berdad cu ta esey,” el a bisa.

E sintomanan ta keintura halto, dolor di cabes, problema respiratorio y neumonia, y por test tur esakinan na Aruba, segun e minister. Te aworaki esaki no ta e caso, pues no tin persona registra cu e sintomanan aki, segun Oduber.

“Danki Dios no tin niun caso registra na Aruba, na e momento aki”, el a declara. Ademas tur e linea di cuido di salud ta na haltura di e sintomanan di e coronavirus nobo. Si den caso un persona ta presenta e sintomanan, tin un procedura pa registra esaki y dobel check cu WHO, pa haya feedback, si berdad ta un caso confirma di e virus aki. Te na e momento aki, e ta reitera, no tin motibo pa preocupacion na Aruba.

Oduber, kende pa prome biaha a referi na e topico aki, a laga sa cu departamento di Salud Publico ta debidamente prepara. El a sigura cu e departamento menciona ta tumando e medidanan di preventivo. Tambe el a compromete di informa comunidad di un manera transparente riba e ultimo desaroyonan. A base di informacion internacional di WHO, e virus aki no ta un brote of epidemia oficial ainda.

Prevencion y turismo.
Na e momento aki, su ministerio hunto cu departamento di Salubridad Publico (DVG) ta na spera di e ultimo notificacion of boletin di WHO. “Nan ta e instancia cu ta duna instruccion na tur e paisnan cu ta afilia na nan, con pa atende cu e caso aki” el a bisa.

Oduber a laga sa cu Aruba a cuminsa tuma tur e medidanan di precaucion. E crisis team ya caba ta activo y tur e linea di salubridad na Aruba a wordo informa ariba e sintomanan.

E preocupacion ta keda logicamente pa nos turismo. El a referi cu Aruba ta depende enormemente for di mercado Mericano, y bo no kier pensa mes di yega na loke a sosode na China di cera un aeropuerto pa evita cu e virus lo sigui plama. “Lo ta catastrofico pa nos economia, pasobra esaki ta nos unico pilar economico,” el a bisa.

E minister a informa cu na e momento aki, WHO tin un encuentro cu China tambe pa nan haya un update di e situacion cu a surgi eynan, y cual ta e siguiente paso cu cada pais lo mester tuma pa prepara nan mes di e miho forma.