Minister di Finanzas, Asunto Economico y Sector Primario, mr. Geoffrey Wever (Futuro) a firma e Landsbesluit cu ta finalisa y formalisa e prestamo cu Gobierno di Aruba a coloca riba mercado di capital internacional. E prestamo di USD 140 miyon ta destina pa refinancia debenan di pasado y pa garantisa cu Pais Aruba por cumpli cu tur su obligacionnan financiero den e luna di december.
Segun minister Wever, e proceso pa yega na e financiamento aki a conoce un trayecto largo y rigoroso, encamina door di e expertonan di Departamento di Finanzas, cu un enfoke estricto riba calidad, credibilidad y di finanzas publico duradero.
“E bon noticia ta cu pa di 31 biaha cu Aruba a haya acceso na mercado di capital, nos a logra e mihor “spread” den henter nos historia di financiamento,” minister Wever a expresa.
Aruba a logra un “spread” di apenas 210 basispunten, e nivel mas abao cu Pais Aruba a registra te na momento aki, loke ta confirma e fortalesa di finanzas publico di e pais. E resultado positivo aki ta, segun minister Wever, consecuencia directo di e reduccion continuo di debe, e presupuesto cu ta conta cu un surplus, y un economia cu ta keda robusto y resiliente.
Un factor importante den e confiansa di mercado ta e hecho cu Aruba ta mantene tres rating di investment grade, otorga door di Standard & Poor’s, Moody’s y Fitch. “Mercado di capital ta reconoce e trabao cu Aruba ta haciendo y ta confirma cu nos ta un pais solido pa inversion,” minister Wever a subraya.
E prestamo aki a atrae tambe inversionistanan nobo, incluyendo diferente gruponan financiero cu pa prome biaha a participa den un transaccion cu Aruba, y cu a tuma porcionnan significante di e financiamento total. Esaki ta fortifica e posicion di Aruba den mercado di capital y amplia su base di lenders internacional.
E minister a anuncia cu e cuenta di Pais Aruba na New York a ser financia cu e USD 140 miyon, permitiendo Aruba cumpli cu tur su debenan y compromisonan financiero. “Nos ta cera e aña 2025 cumpliendo cu nos responsabilidad y nos ta habri 2026 cla, yen di proyectonan nobo, ideanan nobo y oportunidadnan nobo pa cada ciudadano di Aruba,” minister Geoffrey Wever a conclui.
