Ayera durante atardi, Cuerpo Policial di Aruba a informa e lamentable noticia cu e victima di un accidente di trafico cu a tuma lugar dia 8 di juni ultimo, despues di a lucha pa su bida, a fayece.
Tabata diadomingo 8 juni 2025 pa mas o menos 12:20pm a sucede un accidente basta pisa na altura di Today supermarket na Cura Cabai. Un auto mester a alcansa un peaton. Ta trata di un auto di marca Kia, modelo Sonet color shinishi cu tabata riba dicho caminda bayendo direccion abao.
Central di Polis ta dirigi unidadnan di San Nicolas, trafico y ambulance na e sitio. E peaton a keda gravemente herida y a ser transporta cu urgencia pa Hospital.
Tabata despues di varios dia di lucha pa su salud, ayera madruga ta drenta e tristo noticia cu e peaton a fayece. Dokter ta constata morto di e hende homber Michael Gerard Hector naci ariba 3 december 1972 na Aruba.
E caso lamentabel aki ta bao investigacion pa Departamento di trafico.
Cuerpo Policial Aruba y Bon Dia Aruba ta manda palabranan di condolencia pa e famia di e victima.
