Skirbi pa Escritor y Historiado, Dufi Kock

Door di mi contacto continuo cu e Mericanonan cu a traha na Lago y biba den Lago Colony, desde e cierre di Lago, a lo largo nan a haci mi nan reportero aki na Aruba. Un di nan periodico hopi popular cu ainda ta existi ta The Aruba Chronicle cu mi ta mantene nan bon informa riba e desaroyonan di nos pais y principalmente riba e luga unda nan a lanta of biba, esta Lago Colony, un luga cu nan ta stima masha hopi. E dos personanan responsabel pa e Chronicle ta: Sra. Ginger Bassett y Sr. Frank Barnes.

Na juli aña pasa un di e señoranan, Sra. Eleanor Phillips, lesando tur mi contribucionnan na e Chronicle aki, specialmente riba e Di Dos Guera Mundial, a puntra mi si mi a yega di haci contacto cu e National WWII Museum na New Orleans, Louisiana, Merca. E ta un miembro y donante di e museo. Mi contesta tabata negativo. El a bisa mi lo ta un bon idea pa acerca nan pa wak si mi porc ontribui cu potret, historia y video pa lanta un Aruba WWII Section den nan museo. Eleanor ta hopi interesa pa motibo cu e ta sinti hopi orguyoso cu su tata a traha na Lago y hasta sirbi como supervisor controlando e blackout durante e guera.

Dia 26 di juli, 2025, mi a haci mi prome acercamento y pa mi sorpresa nan a bisa mi cu nunca nan a tende cu Aruba tabata envolvi den e Di Dos Guera Mundial, nan no tin nada di Aruba. Ora mi a bisa nan cu Aruba, nos refineria Lago y su hendenan a hunga un rol hopi importante den e guera y sino tabata pa motibo di e 100 octane aviation gasoline cu Lago tabata traha y manda pa e aliadonan, nunca nan por a sobrevivi di e guera desastroso aki. Mesora nan a pidi mi cuminsa manda loke mi tin y nan lo ta hopi contento pa forma un Aruba WWII Section sigur.

Mesora mi a cuminsa manda nan historia (press release na Ingles), potret y video. Pero a lo largo, nan a dicidi pa lanta e Aruba WWII Section den nan Madlyn & Paul Hilliard Research Library cu ta e luga destina pa e materialnan aki. Tur informacion cu mi a manda te awo ta wordo considera como filenan di libreria, kiermen cu, mientrastanto nan lo ta obtenibel pa investigadonan interno y a peticion pa externo. Mientrastanto nan lo no ta den nan catalog publico pa motibo di espacio den nan database. Nan a pidi mi pa haci e anuncio cu nan t’ey.

Mi a caba di ricibi un confirmacion cu e proceso ta andando hopi bon y nan ta hopi contento y satisfecho cu mi a duna atencion y bira un donante pa nan museo. Awo, no solamente nos tin un seccion di guera den un museo grandi, bon reconoci y recomenda, pero ta duna e posibilidad pa nos plama e noticia, fuera di nos frontera, riba e importancia cu nos isla, Lago y e empleadonan a hunga y tambe duna acceso na tur esnan cu ta desea di haci nan investigacion afo di Aruba.

Awe mi a abona y cuminsa ricibi nan newsletters. Nan website: The National WWII Museum – http://www.nationalww2museum.org.

Manera conoci, tur aña, dia 16 di februari, mi ta manda un press release pa tur media pa sigui informa nos hendenan tocante e Di Dos Guera. Wel, awo mi a dicidi di bay mas leu di nos frontera pa laga hendenan di afo sa di e efecto di guera aki na Aruba.

Na aña 2024 tambe mi a ricibi un yamada for di Hulanda di Srta. Patricia Cronie, un periodista di Television Hulandes pa nos traha un filmacion aki di e guera pa e mesun motibo di no sa e rolnan importante aki.