Recientemente, organisacion pa conservacion di parha, Aruba Birdlife Conservation a expresa preocupacion tocante e crisis ambiental rond di e facilidad di tratamento di awa di riool na Bubali, den un comunicado di prensa.

Aruba Birdlife Conservation (ABC) un biaha mas ta comparti su preocupacion profundo tocante e crisis ambiental creciendo rond di e Facilidad di Tratamento di Awa di Riool na Bubali. E problema aki di hopi tempo ta continua erosionando e beyesa natural di Aruba. E situacion continuo ta haci daño profundo na nos bida salvahe, ta menasa salubridad publico, y ta pone un sombra indesea riba nos reputacion como un destinacion sostenible pa turismo.

Mas cu un decada atras, ABC a haci advertencia trempan. Nos a papia cu figuranan clave den liderazgo, sperando pa crea conscientisacion y accion rond di e balans fragil entre maneho di awa di riool y preservacion ambiental. E tempo aya, no na tuma nos preocupacionnan na serio. ABC tin speransa cu e gobierno nobo ta bay demostra lo opuesto, y demostra cu nan si ta compronde y cu nan si ta worry.

Awe, e consecuencianan di mal maneho na e planta di tratamento na Bubali ta hopi cla. Loke por a keda atendi cu prevision a crece den un reto costoso y compleho. E esfuersonan legal andando di Amsterdam Manor pa pusha pa reparacion urgente na e planta na Bubali ta sirbi como un recuerdo skerpi di kico ta pasa ora preocupacion no ta haya contesta. No ta bay pa tira culpa, sino pa siña di pasado pa nos no ripitie nunca.

Responsabilidad pa e sistema a cambia durante añanan, di obra publico (DOW) na e operador actual, Aruba Wastewater Sustainable Solutions (AWSS NV). Y toch e resultado ta keda mescos: un falta di progreso serio, transparencia y responsabilidad, y ni un solo biaha invitando ABC na mesa pa intercambia tocante e impacto riba e bida di parha na Aruba y con pa mitiga dicho impacto.

E impacto riba naturalesa di Aruba ta profundo. Tres di e cinco saliña occidental di Aruba – Saliña Bubali, Saliña Palm Beach y Saliña Druif (Saliña Tierra del Sol – a sufri degradacion severo. E areanan aki, protegi bao Aruba Conservation Foundation (ACF) y reconoci como Ramsar Wetlands oficial, tambe ta designa como Areanan Importante pa Parha y Biodiversidad (IBAs).

Den nan peak, e saliñanan aki tabata hogar na centenares di especie di parha. Saliña Bubali y Palm Beach tabata ricibi hasta 200 diferente parha. Saliña Druif tabata mira mas cu 100. Awendia, dos di nan, Palm Beach y Druif a bira completamente seco. Y Saliña Bubali, antes vibrante y yen di bida, awo ta den un di su estadonan mas precario den historia.

E imagen acompañando e mensahe aki ta mustra 11 Cucharon Cora, parhanan migratorio gracioso cu a haya nan caminda pa yega Aruba. Nan ta bolbe cada aña guia pa instinto, djis pa bin haya cu e habitat riba cual nan ta depende ta desapareciendo. Den proximo simannan, miles di otro parha migratorio ta bay ta yegando. Nan tambe ta bay encontra e realidad tristo di saliña seco y awa contamina.

E situacion ta doloroso, no solamente pa e parhanan, pero pa tur di nos cu ta balora e herencia natural di Aruba. Nos sa cu hopi di esnan den rol di toma di decision awo ta bisa cu ta preocupa profundamente, pero e ora a yega pa match e preocupacion ey cu accion significante.

Nos ta apela na e gobierno nobo pa tuma e asunto aki na serio. Nos tin un oportunidad unico pa cambia e curso di e situacion no desea. Pa inverti den un sistema limpi y funcional di awa di riool. Pa restaura nos saliñanan. Pa protege e ecosistemanan cu ta sostene nos biodiversidad y ta duna forma na nos identidad como isla. Y un gran oportunidad pa restaura e bida di parha salvahe na Aruba.

Tempo no ta un luho. Esaki ta comprension y esaki ta preocupacion.

Ta ora pa “Sembra Speransa” aki tambe.

Ban hacie pa e muchanan.

Nota di redaccion: E opinion den e articulo aki ta di e autor y no ta refleha opinion di Bon Dia Aruba.