Camara di Comercio y Industria Aruba (KvK) orguyosamente a anuncia e fecha y detayenan di e ‘Aruba Chamber Business Event’ pa e edicion di 2019. Esaki lo ta diabierna, 27 di September 2019 den e ballroom di Aruba Hilton Caribbean Resort cuminsando pa 7.30 di anochi. Ta trata di un anochi sumamente valioso pa cada empresario pero tambe persona involucra cu negoshi unda cu oradornan lo trata varios topico di interes. E anochi lo sigui cu un momento pa ‘network’ den un forma ameno cu un banda musical acompaña cu ‘open bar’.

Pa e edicion aki KvK ta sumamente orguyoso di por a convence Sr. Carl Gould for di Merca como invitado international pa bin duna un presentacion. Sr. Gould ta un empresario sumamente respeta mundialmente y a traha pa companianan grandi manera Wal-Mart, Walgreens, American Idol y hopi mas. Tur esaki ta relaciona cu su habilidadnan empresarial cu a hib’e na bira un profesional cu ta yuda companianan crece. Durante e evento na Aruba e lo comparti varios strategia con pa ta exitoso den un mercado cu tin su retonan.

Di Aruba tambe lo tin un orador cu ta Frans Ponson. Sr. Ponson tin un experiencia amplio den e mundo di negoshi na Aruba y lo comparti su storia di retonan y exitonan den bida. Aki sigur e publico presente lo por haya varios ehempel cu lo ta efectivo den nan propio organisacion.

KvK kier gradici CMB, ENNIA cu ta sponsor di “Aruba Chamber Business Event 2019” y un danki na Aruba Hilton Caribbean Resort pa e colaboracion ricibi.

E evento no ta destina solamente pa e doñonan di negoshi of miembronan di e ekipo di maneho pero tambe pa esunnan cu tin influencia riba e exito di e organisacion. Awendia ta hopi importante pa keda innova pa por keda competitivo den un mercado cu constantemente ta desaroya.

Carchinan pa e evento ta obtenibel online ariba www.arubachamber.com of na oficina di KvK. Lo tin un early bird special cual ta valido tanten cu tin den stock of te cu 4 di september 2019. Despues e prijs lo subi. E entrada ta inclui e parti di presentacion di e dos oradornan y 2 ora di networking acompaña pa musica di ‘NFuzion y un open bar.

 

 

LEAVE A REPLY

Please enter your comment!
Please enter your name here