Recientemente, imagennan cu ta bin di e pais panort ta mustra un wega politico cu ta bayendo for di man, desestabilisando e pais y atormentando e ciudadanonan. Y manera custumber, Aruba kier imita loke ta mira den exterior.
Cu Merca desestabilisa, Aruba ta sigui cu seis luna sin un gobierno completo, den limbo ta warda wak si na final e mucha malcria ta bay haya su kier atrobe. Manera ta wordo bisa, niun otro hende tin derecho pa bira minister, e ora pakico no ta acepta cu ta bisa no? No ta djis pasobra e mucha a sinta yora y grita cu henter e pais mester core bay busca manera pa hacie contento.
For di unda nos ta para como ciudadano ta mustra comosifuera e mucha malcria ta e unico opcion pa drenta den gobierno, y si no, palo. Entretanto cu e persona a cargo, e formador cu tin e decision den su man, por a djis pasa e mucha un bon wanta y bis’e keda keto y regla e cuenta. Y listo, nos tur ta sigui nos bida trankil y prospero.
Na un momento unda e tension geopolitico ta menasa di desborda y hinca henter mundo den guera y conflicto, Aruba chikito flotando den lama ta sinta hunga wega politico en bes di atende cu e temanan urgente manera economia, seguridad di cuminda, relacion cu Reino y partnernan internacional den caso cu situacion mundial en berdad bay den caos. Pakico no por djis pone cualkier otro persona capaz den e posicion di minister, cualkier persona cu si por pasa un screening normal sin bay corte y sin drama, en bes di keda forsa pueblo pa participa den e drama comedico aki sin fin? Ta ora pa bira serio y cada ken asumi su responsabilidad! Pueblo mester bin na prome lugar no sed pa poder of pago nan di fabor nan politico.
Autor anonimo.
