Aruba, Bonaire, St Eustatius y Saba, como tambe Qatar, a wordo elimina di e lista di ‘travel corridors’ di Inglatera, despues di un aumento significante di casonan di coronavirus confirma na e paisnan aki.

E ‘travel corridor’ ta inclui cierto paisnan, cu na momento cu un pasahero ta biahando na Inglatera for di un di e paisnan aki, no mester isola. Mester a pasa e ultimo 10 dia na e paisnan aki of na Reino Uni.

Tambe lo elimina Chile, Madeira y Azores for di e lista di ‘travel corridors’ como parti di e respuesta di gobierno na e cepa Brasileño di e virus. Esaki ta yega hunto cu e decision urgente pa prohibi tur biahe na Reino Uni for di varios pais Sur Americano, Portugal, Panama y Cape Verde pa asina preveni transmision di e cepa nobo den Reino Uni, segun website di gobierno Britanico.

Desde 4am diabierna ultimo, solamente ta permiti entrada na ciudadanonan Britanico y Irlandes, y ciudadanonan di otro pais cu derecho di residencia biahando na Reino Uni for di Chile, Madeira y Azores. Nan mester isola pa 10 dia hunto cu miembronan di nan hogar.

Desde 4am diasabra ultimo, hende cu ta bolbe Reino Uni for di Aruba, Bonaire, St. Eustatius y Saba, como tambe Qatar, tambe lo mester isola pa 10 dia despues di yegada.

Na mes momento, FCDO (Foreign, Commonwealth and Development Office) a actualisa su conseho di biahe pa conseha contra tur biahe cu no ta esencial na Aruba, Bonaire, St. Eustatius y Saba, Chile, Qatar, Azores y Madeira.

Gobierno Britanico semper a bisa cu lo tuma accion decisivo, si ta necesario, pa contene e virus, incluyendo si e riesgo di hende cu ta bolbe di un pais particular sin isola ta bira demasiado halto pa salubridad publico, segun e website di gobierno.

Restriccionnan nacional pa Inglatera introduci dia 6 di januari ultimo ta keda na vigor, loke ta nifica cu tur hende na e pais mester keda cas a menos cu ta biahando pa un set hopi limita di rason, incluyendo trabao. Esaki ta nifica cu hende no por biaha pa vakantie mas, ni biaha internacionalmente a menos cu ta pa trabao of otro motibo permiti legalmente. Esnan cu viola e reglanan ta enfrenta castigo maximo di boet di 6,400 libra (~$8,713).

For di 4am dialuna ultimo, tambe ta rekeri pa tur pasahero di tur destinacion presenta un resultado negativo pa test di Covid-19 prome cu biaha na Inglatera pa yuda protege contra e cepanan nobo di coronavirus circulando internacionalmente, y pa identifica esnan cu por ta infeccioso actualmente, segun e comunicado riba website di gobierno Britanico ta conclui.

LEAVE A REPLY

Please enter your comment!
Please enter your name here