Aruba Fair Trade Authority (AFTA) y e Autoridad Regulatorio di Corsou (RAC) a firma un protocol di cooperacion pa join forsa den supervisa suministro di awa y coriente.
Cu e protocol aki, ambos regulador a bay di acuerdo pa traha mas di cerca door di intercambia conocemento, informacion y experticio, segun un comunicado di prensa. Nan tambe a haci areglo pa sesion conhunto di training, internship y reunion regular di consulta. E meta ta pa reforsa e calidad y efectividad di supervision na ambos pais.
“Door di comparti nos experiencianan y duna sosten na otro, nos por responde miho na e retonan dentro di sector di energia y utilidad,” segun Curt Belfor, CEO di RAC.
Drs. Roly Sint Jago, presidente di hunta di director di AFTA, tambe a enfatisa e importancia di e colaboracion: “E acuerdo aki ta duna nos oportunidad pa siña di otro y pa construi conhuntamente un marco regulatorio stabiel y transparente pa Aruba y Corsou.”
E acuerdo di cooperacion ta alinea cu e ambicion mas aimplio di ambos autoridadnan pa promove colaboracion regional y di e manera ey contribui na desaroyo economico sostenible den parti Caribense di Reino.
