Diaranson atardi den e sala di recreo di club di gimnasia Avanse, Federacion Gimnastico Arubano a anuncia e gran evento internacional di gimnasia ritmica, Aruba International Cup cu pa prome biaha lo tuma luga na Aruba cu dos invitado di nivel mundial.

Presidente di e federacion y alabes miembro Avanse, sra. Milly Bagheri-van Trigt a hiba palabra splicando un poco riba e competencia cu lo bay tini cu ta esun ritmico kisas no mucho popular manera e gimnasia artistico. Pa conmemora e di 35 aña cu e deporte di gimnasia ta existi na Aruba esaki lo ta un celebracion unico. E gimnasia ritmica ta uno hopi bunita y elegante y esey mes lo ser spera e dianan di e competencia aki. Algun luna atras e presidente di e federacion mundial di gimnasia tabata na Aruba y cu su ayudo a percura pa e yuda trece e competencia internacional Aruba.

Coach nacional, srta. Adriana Miles Sevilla tambe a elabora riba e competencia unda e la conta cu esaki lo ta e prome competencia internacional ritmica y cu lo bini cu dos invitado di nivel mundial. Esakinan ta nada menos cu un dos bes mediyista di Oro Olimpico, Evgenia Kanaeva di Rusia y dos bes campeon nacional di Hapon, Uzume Kawasaki. Na e Aruba International Cup 2019 cu participacion di alrededor di 70 atleta lo tin participacion di paisnan manera Mexico, Colombia, Canada, Costa Rica, Republica Dominicana y USA

Miguel Arrebola Ortiz cu ta forma parti di e comision organisado a elabora kico tur por spera e 4 dianan esta 15, 16 17 18 y 19 di december proximo na Centro Deportivo Betico Croes unda e competencia lo tuma luga. Ta bon pa menciona si cu e atletanan Evgenia Kanaeva y Uzume Kawasaki na banda cu nan lo duna demostracion di e gimnasia ritmica, lo duna tayer riba nan deporte pa tur atleta afilia.

Federacion di gimnasia ta honra y orguyoso di tin e dos tremendo atletanan cu nan na Aruba y mas cu claro pa host e prome competencia internacional di gimnasia ritmica na Aruba.

 

LEAVE A REPLY

Please enter your comment!
Please enter your name here