Aruba lo sinti efecto di tormenta tropical mañan

Comunidad di Aruba mester ta prepara pa e efectonan di un tormenta tropical cu ta biniendo for di Trinidad y  cu lo pasa den vecindario di e islanan ABC (Aruba, Corsou y Bonaire). E  lo por tin un impacto di awa y biento pa Aruba for di mañan diamars den oranan di anochi laat. Pa diaranson e lo ta net panort di nos isla.  Igualmente e  modelo atmosferico ta mustra cu unabes cu e ta pasa e islanan ABC,  e ta perdiendo forsa.

Eventualmente e tormenta aki lo trece yobidanan pa nos isla, entre 15 pa 25 millimeter, y por ta localmente algun area lo por haya un tiki mas. E biento lo keda por lo general den direccion oost, pero e lo por cambia den direccion zuidoost tambe cu forsa entre 10 pa 20 nudo; y maximo 30 pa 35 nudo.

Premier di Aruba,  Mike Eman hunto cu director di Dep. di Meteorologia, Mark Oduber a haci e anuncio aki, caminda lo monitor e comportacion di e tormenta aki pa wak si tin cambio den su desaroyo; y  nan lo mantene informa nos comunidad debidamente. Te awe mainta e tormenta aki tabata desaroyando den Caribe na 660 kilometer for di zuidoost  di Trinidad.

E chens -segun modelo atmosferico- no ta grandi pa e desaroya; y mas bien e ta wordo categorisa como un “Potential Tropical Cyclone Two”.  Te awor e ta keda e mesun escenario, segun Sr. Oduber.  Unabes cu e ta pasa Trinidad e tormenta lo drenta den un area cu e condicion no ta faborabel pa e tormenta aki desaroya. “Esaki por haci algun cambio; y pone fluctua den forsa y e por debilita. Pero semper bo mester ta cauteloso…”,  el a bisa.

Sr. Oduber  ta cualifica e sistema aki un “tiki fastioso”,  ya cu ainda e no ta bon forma. Nan lo sigui monitor e ultimo modelo a base di datonan di Nacional Hurricane Center pa evalua si ta necesario pa bini cu un Tropical Storm Watch  pa nos isla. E no ta descasta cu e anuncio aki lo wordo haci ya cu un tropical  storm  watch ta nifica cu ta wordo anuncia cu tin e posibilidad di un sistema tropical den bo bisindario; y cu nos por haya biento di tormenta tropical. E ta haya cu e anuncio aki lo ta uno prudente y nan lo pone den nan boletin, si ta necesario pa nos isla.