Aruba mester acepta e Rijkswet Financieel Toezicht pa por haya ayudo financiero Hulandes. Hulanda na ultimo momento ta bin cu un exigencia nobo pa Aruba pa asina por ricibi e siguiente prestamo Hulandes, pa un total di 204 miyon florin. Ta sumanan cu mester cubri gasto di Gobierno, FASE y otro pa e siguiente tres lunanan.

Prome Minister Evelyn Wever-Croes a keda sorprendi cu e condicion nobo aki diadomingo anochi, despues di a ricibi un yamada di Secretario di Estado, Raymond Knops kende a bisa cu Rijkswet Financieel Toezicht ta un exigencia pa e ayudo. Un condicion cu no tabata den discusion mes.

Es mas, un condicion lo tabata un entidad nobo entre gobierno di Hulanda y di Aruba, pa atende e prestamo y control di e uso di placa cu ta fia. E entidad nobo aki, cu tambe a keda palabra cu paisnan Corsou y St. Maarten, lo mester traha entre Hulanda, Aruba y CAFT cu ta supervisa finanzas di Aruba. Es mas, e motibo pakico Hulanda lo a fia Aruba 204 miyon florin ta netamente pasobra CAFT a conseha Conseho di Minister di Reino pa haci tal ya cu Aruba a sigui e pasonan necesario. Por ehempel, a corta den salario publico manera Hulanda a exigi.

Pero, te ainda, Hulanda no a splica ni manda documento riba e entidad aki y con e lo ta hinca den otro.

Mescos ta conta cu e condicion nobo cu a bin como sorpresa, esta e exigencia pa Aruba cay bao e Rijkswet Financieel Toezicht, cu a bin na vigor na momento cu Hulanda a dicidi pa duna saneacion di debe na Antiyas Hulandes prome cu paisnan Corsou y St. Maarten a haya nan Status Aparte. E condicion tabata cu e dos paisnan mester a acepta e supervision di Reino riba nan finanzas publico. Algo cu segun Prome Minister Evelyn Wever Croes, a costa economianan di e paisnan grandemente. “No ta ami a bisa esey,” Wever Croes a enfatisa. El a sigui splica cu Fondo Monetario Internacional den su rapportnan a ilustra con CFT y e forma con a implementa e supervision a stroba e gobiernonan pa hiba un maneho economico na beneficio di nan comunidad, cu tur su consecuencianan. Economia di Corsou por ehempel a conoce diferente contraccion.

Aruba sinembargo tambe ta cay bao supervision financiero, pero esaki ta regla via un ley Arubiano. Parlamento di Aruba a bay di acuerdo cu e Landsverordening Financieel Toezicht, LAFT, cu ta dirigi CAFT. Pa por pasa pa e RFT, Parlamento lo mester duna dos/tercera parti sosten. Y tur esaki, prome cu diabierna awor, dia 3 di juli.”

Pa Prome Minister Wever Croes, e exigencia di gobierno di Reino no ta algo cu por acepta sin mas, pero e ta pone Aruba lomba contra muraya si. Pasobra gobierno no tin e fondonan necesario pa cumpli cu su obligacionnan. Por ehempel, esnan cu ta cobra pa quincena, lo no por ricibi nan pago cuminzando na juli caba.

E pregunta sinembargo ta di con ta bin cu e condicion aki na ultimo momento. CAFT a aproba e maneho financiero di Aruba y pa tal motibo mes a conseha gobierno di Reino pa dal bay cu e pago di 204 miyon pa e siguiente tres lunanan.

Wever Croes a bisa cu den su conversacion telefonico cu Knops, el a informa e Secretario di Estado cu su so lo no carga e decision pa acepta e Rijkswet y a pidi e condicion aki por escrito pa asina por delibera riba dje den consulta cu gremionan y cu Parlamento di Aruba. E prome consultanan a inicia ayera tardi caba.

Segun Prome Minister, pa e ciudadano mes, e cambio di LAFT pa RFT, no ta algo grandi. Pasobra de facto, CAFT ta haci un trabao di supervision. Sinembargo, e ta nifica si cu Hulanda lo por duna instruccion mas directo pa medio di e ley di Reino.

Por tin cierto beneficio mara na e RFT, entre otro cu Aruba lo por haci prestamo na Hulanda na cero porciento. Si en caso Hulanda refinancia debe di Aruba na cero porciento, pais Aruba lo por scapa como 250 miyon florin na interes (cu e ora por bay na baha e debe).

Pero no ta sigur bao ki condicion esaki lo ta. Como tal, a pidi Secretario di Estado manda e exigencia por escrito. “Normalmente ora ta discuti un punto asina, e trabao ta inicia na nivel di ambtenaar. Y ora cu esaki ta cla, ta mand’e pa Gobierno. Ma compronde cu ta apenas awor ambtenaarnan a comunica cu otro.”

Bon Dia Aruba a tuma contacto cu vocero di Secretario di Estado, Raymond Knops riba e desaroyo aki y e contesta cu a ricibi tabata hopi cortico. “Mirando cu no ta permiti pa anticipa decisionnan di Conseho di Minister di Reino , Secretario di Estado Knops lo no haci ningun declaracion na medionan awor aki.”

Mester bisa cu ta apenas algun dia pasa cu CFT a anuncia cu Rector di Universidad di Aruba Dr. Glenn Thode a keda apunta miembro nobo di e entidad, pa islanan BES. Dr. Thode den pasado tabata den Directiva di Fondo Desaroyo Aruba y tambe tabata den e directiva anterior di Parke Nacional Arikok.

 

LEAVE A REPLY

Please enter your comment!
Please enter your name here