Recientemente a tuma luga e clausura di e Justitieel Vierlandenoverleg cu tabata tumando luga aki na Aruba y cu a conta cu presencia di ministernan di Husticia di Aruba, Arthur Dowers; Sint Maarten, Nathalie Tackling; y Corsou, Shalten Hato. Durante un conferencia di prensa pa clausura e reunion, e ministernan a splica con e reunionnan a bay y kico tabata algun di e temanan cu tabata riba mesa.

E Justitieel Vierlandenoverleg e biaha aki no a conta cu presencia di minister di Husticia Hulandes, David van Weel, door cu e no por a biaha pa motibo di trabao urgente.

Minister Dowers a splica cu e tres paisnan, Aruba, Corsou y Sint Maarten a scoge pa haci e reunion den aspecto tecnico y probecha e oportunidad hiba reunionnan di contenido y papia riba diferente reto cu e paisnan ta enfrenta.

Minister di Husticia di Sint Maarten, minister Tackling a indica cu durante su bishita pa e Justitieel Vierlandenoverleg nan a bishita KIA na y tabatin reunionnan bilateral cu e ministernan di Corsou y di Aruba. El a sigui splica cu tambe tabatin e oportunidad pa e reunion tripartiet pa discuti topiconan cu ta significante y importante pa Sint Maarten, y con nan por traha hunto riba un termino cortico pa traha riba e problemanan aki hunto. Topiconan manera crimen bao di e hobennan y violencia di arma bao di e hobennan como tambe violencia di arma general na tur tres pais.

El a agrega cu nan a dialoga tambe riba desafionan cu nan ta enfrenta na Sint Maarten ora ta trata di capacidad di cel y e buskeda di asistencia pa wak con e otro paisnan por asisti Sint Maarten cu esey.

“Mi kier gradici mi coleganan di Aruba y Corsou tambe pa expresa nan sosten y pa tambe sostene nos, naturalmente, un biaha mas cu e crisis cu nos a haya na prizon Point Blanche na Sint Maarten. Mi ta spera di por sigui traha hunto y sigui crece e relacion aki,” minister Tackling a remarca.

Minister di Husticia di Corsou, minister Hato, a indica cu e ta agradecido pa cera conoci cu e otro mandatarionan personal y alabes hiba combersacionnan bilateral cu otro.

El a splica cu durante su bishita nan tabatin e oportunidad tambe pa bishita, entre otro, Departamento di KPA caminda nan a intercambia di conocemento pa cu polis di bario y a para keto tambe riba e plataforma di colegio caminda cu korpschefnan ta bini hunto pa debati y intercambia riba e retonan diario cu nan ta confronta nan mes cu otro.

El a sigui splica cu nan a papia entre otro riba crimen bao di e hobennan mirando cu e hobennan ta e futuro. Tambe a para keto riba e tema di legalisacion, caminda cu a nota cu tur tres pais ta canando e mesun trayectorio pa combati e problematica di indocumentado na nan pais, mirando tambe cu nan kier combati entre otro traficacion di hende, mal uso di esnan cu ta mas vulenrable den e tres paisnan.

Minister Hato a indica cu nan a yega na otro, a comparti conocemento tambe y tocante e problema di arma ilegal den e tres pais, tambe nan a hiba un combersacion extenso y a hasta yega na otro pa loke ta trata combatimento di arma y crimen bao di e hobennan, pa traha mas estrecho cu otro caminda e departamentonan concerni tin cu bini hunto y asina zorg pa mas pronto posibel bin cu un plan di accion.

Minister Dowers a accentua cu loke su coleganan minister a trece dilanti y a enfatisa e importancia di e cooperacion continuo cu ta existi pa loke ta trata husticia den e Reino Hulandes.

El a splica cu ta conoci cu e tema di husticia ta un asunto di cada oais di Reino y no ta un responsabilidad di Reino. El a agrega cu sinembargo e paisnan a scoge basta aña pasa, den un forma boluntario, pa crea un sistema di cooperacion caminda cu cierto aspectonan di husticia ta ser haci den conhunto pa garantisa e continuidad di e cooperacion aki y garantisa cu tin funcionamento optimal.

El a menciona como ehempel e escogencia pa establece un Hof van Justitie cu ta funciona pa tur e partinan di Reino Hulandes. E mandatario a splica cu e Hof aki ta haci posibel tambe cu nan ta garantisa seguridad huridico, pero tambe a posibilidad pa por ehempel inversionistanan inverti den e paisnan sin cu nan ta core ningun riesgo adicional pa motibo cu e sistema hudicial no ta funciona.

Minister Dowers a subraya cu e sistema hudicial ta funciona na un nivel hopi halto, a pesar di tin su retonan, door cu e paisnan a scoge pa traha hunto den diferente tereno, aunke e no ta un obligacion legal pa nan haci’e, pero nan ta scoge pa haci’e den forma boluntario.

El a enfatisa cu e cooperacion entre e paisnan ta un cooperacion cu a crece y a ser manteni y cultiva over di basta aña y nan a mira e necesidad pa sigui haci esaki tambe. Sinembargo, el a agrega, nan ta mira tambe cu caminda nan traha hunto tin momentonan importante cu mester haci un check-up pa mira si e cosnan ta bayendo manera cu nan ta haya cu nan mester bay. El a remarca cu momento cu e ministernan ta bini hunto y cu e ambtenaarnan a topa den e reunionnan aki ta momento pa haci netamente esey.

“E paisnan ta ser confronta cu retonan grandi for di nos region, pero tambe for di e sociedadnan, y esunnan cu nos ta comparti den sociedad nos ta traha hunto riba dje y loke colega ta bisa nos mester haci palabracionnan con nos ta sigui y ta papia tambe con por duna continuidad riba nivel di maneho,” e mandatario a remarca.

El a splica cu berdad ta asina cu riba nivel operacional lo mira cu regularmente diferente organisacion den e paisnan ta coopera cu otro, pero a subraya cu nan mester bay saca mas for di esaki y lo mester haci esey den forma di un maneho pa cual mester haci palabracionnan y duna contenido den e dianan y simannan cu ta sigui riba e temanan menciona.

Minister Dowers a señala cu awor Hulanda ta mas cerca compara cu antes door cu BES ta teritorio Hulandes directo cual ta nifica cu Hulanda su responsabilidad den e teritorio aki a bira mas grandi, locual ta significa tambe cu Hulanda ta ser confronta cu e mesun retonan y ta compronde tambe miho e retonan aki.

“Esey ta haci cu nos ta bira partnernan cu ta dispuesto pa traha cu otro, cu ta compronde otro miho pero esey no ta nifica cu e no tin su desafionan. Mester keda inverti den aspecto humano di cooperacion y esey mi ta sinti cu e boluntad t’ey cerca tur e partidonan. Nos por wak back riba un cooperacion y dianan di reunion hopi constructivo,” e mandatario a enfatisa.