Ayera mainta pa 6:55am, Central di Polis a ricibi un notificacion cu tin un persona benta abao cu sla na curpa na Linear Park, na altura di Aruba Surfside Marine.

Polis a informa cu a despacha un patruya na e sitio y tambe a manda un ambulance pa atende cu e suceso.

E suceso aki a tuma lugar despues cu pa 2or di madruga ayera, Aruba a conoce su di 11 morto den trafico despues di un accidente na Ponton, unda e chauffeur a fayece. Por lesa mas di e suceso aki riba pagina 14.

Na yegada di e patruya pa e incidente na Linear Park, por a constata cu un señora tabata benta na suelo y su situacion tabata grave. E prome informacion ta cu e señora a wordo alcansa pa un vehiculo di motor y e chauffeur a sigui core bay, lagando e señora gravemente herida atras. Esaki ta un acto castigable pa ley, segun polis a informa den un comunicado di prensa.

Ambulance a yega na e sitio, y personal di ambulance a duna asistencia na e señora y a bay abao cune cu maximo urgencia pa hospital. Lamentablemente, na yegada di e ambulance na hospital, e señora a fayece.

Pa 7:49, dokter a constata morto di Rosa Montaño Marinez, di 60 aña di edad naci na Republica Dominicana.

Segun e relato di polis, a pidi specialista di trafico como tambe polis tecnico na e sitio pa haci nan investigacion.

Cuerpo Policial ta haci un apelacion si un persona por a wak algo of sa algo, pa yama e tiplijn di polis cu ta 11141.

Cuerpo Policial Aruba ta manda palabra di condolencia na famia di e fayecido.

E caso ta bao investigacion.