Ayera mainta, Parlamento di Aruba a tene su ultimo reunion publico pa loke ta trata periodo di aña 2017 te aña 2021 cu parlamentarionan perteneciente na partido MEP, partido AVP, partido POR y partido RED.

Juan Ady Thijsen cu tabata presidente di Parlamento di Aruba te ayera a ofrece algun palabranan pa esunnan cu tabata presente den e sala mirando cu ayera tabata e prome biaha cu parlamento a ricibi publico despues di pandemia di Covid-19.

Esaki sigur tabata un parlamento cu a conoce hopi cambio na unda algun partidonan a cay den problemanan interno, parlamentarionan a keda independiente, un partido a perde un minister, a wordo nombra e prome parlamentario mas hoben den historia den parlamento, asina como tambe algun miembronan a keda envolvi den casonan di corupcion y otronan no a haya sosten pa logra su meta como por ehemplo, legalisacion di cannabis.

Di mesun manera, a wordo treci dilanti e verificacion y admision como miembro di Parlamento di Aruba pa e proximo periodo di aña 2021 pa aña 2025 na esunnan cu a wordo eligi den ultimo eleccionnan di dia 25 di juni como Miguel Mansur, Marisol Lopez Tromp, Aquannette Gunn, Evelyna Wever-Croes, Xiomara Maduro, Dangui Oduber, Glenbert Croes, Rocco Tjon, Arthur Vallejo, Hendrick Tevreden, Endy Croes, Edgar Vrolijk, Mike Eman, Mike de Meza, Arthur Dowers, Gerlien Croes, Oslyn Sevinger, Ryçon Santos do Nascemento, Mervin Wyatt Ras, Ursell Arends y Geoffrey Wever.

Di esunnan cu ta bandona parlamento cu a destaca cu nan discurso di despedida tabata Dahpne Lejuez, e cual a ofrece algun palabra di gradicimento pa duna e oportunidad di forma parti di parlamento y alabes un pabien na prome minister demisionario Evelyn Wever-Croes pa e logro di votegetter di Aruba den eleccionnan ultimo y tambe pa Marisol Lopez-Tromp como ehemplo di orguyo como ser femenino cu a wordo reconoci pa nan trabou incansabel.

Di mesun manera, el a duna un danki na esunnan cu a deposita nan voto pa su persona dia 25 di juni ultimo y tur exito pa Parlamento di Aruba number 11 mirando e retonan cu Aruba ta presenta na e momentonan aki.

Ricardo Croes lider di fraccion di partido RED Democratico cu den ultimo eleccion no a haya suficiente cantidad di voto pa por keda den parlamento den periodo nobo a expresa cu e tempo cu el a pasa den parlamento aki “ta un tempo cu mi hamas lo lubida” na unda el a reitera cu el a drenta den parlamento cu su idealnan y e no a sucumbi na un solo momento pa ni un sorto di presion pa e entrega su idealnan y pa esey e ta sinti su mes hopi bon, segun loke Croes a sigura.

“Mi ta sali for di akiden cu sentimentonan mixto, pasobra mi ta realisa cu e mentalidad di e pais aki tin hopi ainda pa bay” el a sigura.

Asina mes, el a declara cu “pueblo ta bay realisa cu mi palabranan tur ta bay bira berdad y ta tur cu nan dedenan no por keda caminda mester tabata, mi ta espera papa dios pone tur paga, tur cu ta bao investigacion awor y cu ta bay bao investigacion awor tambe” Croes a señala referiendo na e palabra integridad.

Alan Howell cu ta un di esunnan cu tampoco a haya sosten pa por keda den parlamento den ultimo eleccion a expresa su gradicimento pa por forma parti di dje den casi cuater aña y tambe pa por asumi diferente rol na unda el a biba “experiencianan inolvidabel cu cosnan bon y cosnan malo” segun el a comenta.

“Experiencianan menos agradabel cu ma pasa tabata na momento cu ma haya cu mi mester confronta cu un asina yama caso penal cu mi mester a haya y mi ta defende mi curpa den dje, mi ta gradici dios cu na momento cu esaki a presenta, danki dios na integridad cu mi tin cu mi por a prueba y demostra cu nada robes no a tuma luga, cu nos por a entrega e parti administrativo na Openbaar Ministerie habri pa nan por mira cu no tin nada straño ni nada robes”, Howell a finalisa.

Otronan cu tambe no lo conforma e proximo Parlamento di Aruba ta Michael Lampe, Jennifer Arends Reyes, Marlon Sneek, Robert Candelaria, Richard Arends, Allan Howell, Deyanira Maduro, Ricardo Croes, Setty Christiaans-Yarzagaray y Darlaine Erasmus.

Ayera Aruba a despedi di un Parlamento cu a marca historia y cu awe lo tin un otro parlamento, cu 11 cara nobo y cu sigur lo trece un otro dimension den politica di Aruba.