images.jpg

Den un carta cu Bon Dia Aruba a obtene exclusivo diasabra anochi y a publica riba su website, por lesa cu prome minister Mike Eman ta exigi di Conseho di Minister di Reino pa hala e nombracion di Alfonso Boekhoudt como e proximo gobernador aden.

 

Sr. Eman a manda e carta pa prome minister di Hulanda Mark Rutte den su funcion como presidente di e Conseho di Minister di Reino. Segun sr. Eman e decision pa nombra sr. Boekhoudt no ta legitimo. E nombramento ta ‘flagrantemente contra e reglanan cu Conseho di Minister di Reino a stipula’, asina e prome minister ta skirbi den e carta di 12 di october.

 

E ta pidi tambe pa cambia di idea cu sr. Rutte tocante di esaki riba termino corto. E procedura cana segun sr. Eman di parti su Conseho di Minister, no ta cuadra cu e reglanan di Reino. E tambe ta skirbi cu for di comienso Aruba a indica cu Angel Bermudez ta nan candidato pa bira e gobernador nobo. Pa motibo di esey sr. Bermudez, cu awor ta minister di Financia, a wordo invita pa un encuentro cu e minister di Asuntonan di Reino, esta Ronald Plasterk.

 

Premier Eman ta bisa tambe cu e minister di Asuntonan di Reino riba su mes no por nomina candidatonan pa gobernador, solamente e Conseho di Minister di Aruba por haci esaki segun e procedura stipula.

 

Plasterk ta nenga

Nos partner den noticia Ret Karibense a trece siman pasa cu minister Plasterk mes a nomina Boekhoudt como candidato-gobernador. Segun gabinete Eman esaki no por, sinembargo e mandatario Hulandes a nenga cu Hulanda no a cumpli cu e reglanan di nombramento, segun e fuente. Por medio di su vocero e ta laga sa cu e procedura ‘a bay conforme e stipulacion di Statuut’.

 

Minister Plasterk no kier comenta riba e carta di prome minister Eman. Ni tampoco si e ta bay retira e decision. “Mester contesta e carta ainda”, asina e vocero ta bisa. E no por bisa tampoco si a tuma contacto caba cu gobierno di Aruba pa motibo di e disturbio cu a sugeri.

 

Segun e mandatario Hulandes e ta ‘obvio cu sr. Boekhoudt lo retira di su funcion actual di minister Plenipotenciario’ awor cu entrante di januari e lo bira e representante di Rey na Aruba. Sinembargo diabierna gabinete Eman a informa cu ta manda sr. Boekhoudt cas entrante 1 di november pa motibo cu nan no tin confiansa mas den dje.

 

Segun nos fuentenan e gabinete Eman ta rabia pa motibo cu sr. Boekhoudt a acepta e posicion di gobernador tras di lomba di gobierno. E mesun diabierna prome minister ya a firma e decreto di Boekhoudt su retiro hunto cu e gobernador actual Fredis Refunjol. No ta conoci te awor kende lo asumi e funcion di minister Plenipotenciario na Hulanda.

 

LEAVE A REPLY

Please enter your comment!
Please enter your name here