Diabierna ultimo Aruba a firma un acuerdo cu Colombia riba tereno di aviacion civil. E acuerdo ta sumamente importante pa Aruba, na unda e paisnan lo coopera y yuda otro riba algun tema hopi specifico. Esaki ta un cooperacion tecnico riba e area di investigacion di accidente, desaroyo di aviacion sostenibel y maneho di siguridad operacional.
Ademas di esaki, tambe a papia cu Colombia riba e topico di transporte di carga aereo entre e dos paisnan.
Di parti di Colombia e acuerdo a ser firma door di Sr. Bg. Gr. Jose Henry Pinto Rodriguez, Director di Aerocivil Colombia, y di parti di Aruba door di Sr. ing. Edwin F. Kelly, Director di Departamento di Aviacion Civil. A firma e acuerdo den presencia di Sr. Christopher Barks, Director di ICAO pa e continente Nort Americano, Centro Americano y Caribe.
A firma e acuerdo na aeropuerto di Rionegro, Colombia, durante e Feria Aeronautica 2025, den cual algun pais specifico, entre otro Aruba, a haya un invitacion special pa participa. Aruba a participa na e parti academico di e Feria, cu e aña aki tin enfoke riba desaroyo di aviacion sostenibel, particularmente e aplicacion di combustible di aviacion sostenibel (“Sustainable Aviation Fuels”). Segun un comunicado di gobierno, esaki tin un balor agrega enorme pa Departamento di Aviacion Civil di Aruba, cu na e momentonan aki ta trahando riba un plan nacional integral pa loke ta aviacion sostenibel alinea cu e strategia y rekisitonan di Organisacion Internacional di Aviacion Civil (ICAO). Un di e ambicionnan principal di ICAO ta pa na aña 2050 alcansa mundialmente un nivel di emision di carbono di 0% netto.
Ambos director a enfatisa cu Aruba y Colombia semper tabata tin un relacion special, di amistad y hermandad, tambe pa loke ta trata aviacion civil. E acuerdo firma lo habri caminda pa un cooperacion mas fuerte cu lo beneficia ambos pais grandemente, particularmente riba e parti socioeconomico.
E acuerdo aki ta alinea cu e maneho di Departamento di Aviacion Civil di Aruba pa sigui fortifica su mes pa medio di aliansanan strategico y di cooperacion mutuo.
