Den Reino Hulandes tin dialogo riba e topico di Sclavitud. Diaranson na Corsou e Paisnan den Reino ta bin hunto pa reuni riba e topico aki relata na e despensa y reparacion cu Gobierno di Hulanda kier bay duna pa e daño haci cu e negoshi di sclavitud den Reino Hulandes.
Otro aña dia 1 di juli ta conmemora e 160 aña cu a aboli sclavitud den Reino y ta importante pa nos dialoga riba kico un despensa lo significa pa Aruba y e otro Paisnan den Reino Hulandes y tambe di ki manera lo por repara e daño haci asina hopi tempo pasa.
Minister Maduro ta informa cu Aruba tambe ta participa den e dialogo aki na Corsou y ta wordo representa pa Sr. Luc Alofs, Sr. Dimitri Halley, Sr. Clifford Rosa y Sra. Shanoulle Bikker. Nan lo reuni cu e representantenan di e otro Paisnan hunto cu Secretario di Estado Van Huffelen riba e topico aki.
E mandatario ta enfatisa cu ta importante pa nos bishita nos historia, puntra nos mes dicon esaki a pasa y percura pa den e presente kita locual ainda a resta di e periodo scur aki di nos historia comparti. Cada un Pais mester pone un spiel su dilanti y cada Pais mester dicidi pa nan mes con nan kier mira un reparacion tuma luga.
Di su banda, Stichting Rancho a comenta den un articulo riba nan website cu Sr. Clifford Rosa, presidente di Fundacion Rancho, a wordo invita pa VNO – Vertegenwoordiging van Nederland in Oranjestad, pa uni cu e delegacion di Aruba den e conferencia “Slavernijverleden” cu a tuma lugar na Corsou dia 23 di november ultimo. Como representante di Stichting rancho, Sr. Rosa tin como meta pa conserva e historia y cultura di Rancho y Oranjestad, y den e contexto aki a participa y dialoga riba e tema di pasado di sclavitud na Aruba y e otro islanan di Reino Hulandes. Segun nan articulo, den e conferencia aki a bini na cla cu gobierno di Hulanda ta bay pidi dispensa pa su participacion den e historia di sclavitud.
