Pa nos por compronde di un forma mas amplio dicon proteccion di nos biodiversidad marino ta importante, prome nos tin cu compronde kico realmente esaki ta encera.
Biodiversidad marino ta referi na e variedad di bida den nos oceano. E ta inclui tur bestia, planta y microrganismo cu ta bibando den nos oceano, for di bayena te coral reef. E termino tambe a algo cu ta usa pa describi e abundancia di especie cu ta biba den un area.
Tin cierto luga cu tin asina un variedad grandi di especie diferente y poco comun cu ta referi na nan como ‘hotspot’ biologico. E areanan aki cu tin un biodiversidad sumamente amplio, generalmente ta sostene procesonan biologico importante manera areanan pa cria of duna cuminda. Algun te hasta tin especie cu bo no ta haya ningun otro caminda na mundo.
Ehempel di hotspot di biodiversidad marino ta inclui Benguela Current Large Marine Ecosystem na e costa di Namibia y e region centro Indo-Pacifico, cual ta inclui e coral reefnan di Suroost Asia y Australia, ademas di contene e cantidad mas halto di especie den un solo areea.
Oceano ta algo cu ta esencial na e existencia di ser humano, conteniendo te hasta 80% di e biodiversidad na mundo. Biodiversidad marino ta permiti naturalesa den nos oceano ta uno cu ta productivo, resiliente y cu un habilidad di por adapta na cambionan ambiental. No solamente esaki, sino cu biodiversidad Marino por preveni tambe cu e extincion di un especie por causa un impacto negativo mas amplio riba e ecosistema marino.
Caribe ta reconoci como un di e hotspotnan mundial pa biodiversidad, E oceano ta mira varios ecosistema manera coral reef, mangel, entre otro, cu ta provee habitatnan critico pa varios especie, incluyendo te hasta parhanan endemico y bestianan marino cu ta den peligro di extincion, manera e ‘hawksbill sea turtle.’
Un di e ecosistema mas scucha ta e coral reef, cual Nacionnan Uni su Environment Program ta splica como e ecosistema mas biologicamente diverso den nos oceano. Nan ta presente den mas di 100 pais y teritorio y mientras cu nan ta cubri menos di 1% di e tera bao awa, nan ta sostene or lo menos 25% di e especienan marino – cargando asina e biodiversidad mas halto di cualkier ecosistema global. Esaki tambe ta haci cu nan ta un di e ecosistema mas valioso riba e planeta.
Coral Reef ta trece seguridad, proteccion di costa, bienestar, seguridad di cuminda y seguridad economico na centenares di miyones di persona na costa den e paisnan menos desaroya, economianan den transicion y islanan chikito den desaroyo rond di mundo.
E balor por ehempel di loke coral reef ta provee, manera turismo, pesca, proteccion na costa y te hasta ingredientenan medico, ta calcula na alrededor di $2.7 triyon pa aña.
Ora tormentanan ta yega cerca di oceano, nan ta golpia e costa cu un forsa sumamente grandi. Cu cambio di clima, e tormentanan aki su intensidad lo keda aumenta den e añanan binidero, ademas di e capacidad di olanan den pasa e costanan y causa destruccion. Pa miles di costa tropical, naturalesa a provee un forma impresionante como proteccion, y esaki ta e coral reefs cu manera menciona, ademas di ta un ecosistema extremadamente valioso, ta un protector cu naturalesa a regala nos.
E coral reef ta un structura sumamente robusto y duradero, crea pa bestianan sumamente chikito cu skelet di calciumcarbonaat, cual ta provee un servicio importante na e costanan cu ta nan tras; absorbe te hasta 97% di e energia di e olanan. Ademas di esey, nan ta preveni inundacion den nacionnan Caribense.
Benji Jones a skirbi un articulo tocante esaki publica den Vox, unda ta detaya cu e sistema di defensa contra horcannan mortal den Caribe ta disparciendo, y aki e ta referi na coral reef. Nacionnan den Caribe ta particularmente vulnerable na horcan, pa e motibo obvio cu hopi biaha nan ta den ruta di e tormentanan.
Cada pida di reef ta un colonia di e bestianan chikito anteriormente menciona, cual ta yama polyp.E olanan ta perde nan energia ora cu nan golpia contra e coral reef, y mientras mas grandi y halto e reef ta, mas energia e ta absorbe. Te hasta un reef chikito por haci un diferencia, imagina un reef grandi, saludable cu ta conta cu e sosten di ser humano pa su bienestar y proteccion.
Segun Elizabeth Rholetter a skirbi den un investigacion, a pesar di su rikesa ecologico, e oceano Caribense ta enfrenta menasanan grandi di actividadnan humano y cambio di clima, cual ta causando e destruccion di habitat y caida den poblacion di especienan, pero tambe e perdida di coral reef.
Rholetter ta conta cu e region a mira un reduccion dramatico den cobertura di coral, empeora pa sobrepesca, contaminacion y tempratura di lama cu ta keda subi. Esfuersonan ta na caminda pa proteha e ecosistemanan aki, cu varios areanan proteha estableci, sinembargo ambientalistanan ta enfatisa cu medidanan mas robusto y miho practicanan di maneho ta necesario pa garnaitsa e sobrevivencia di e biodiversidad unico aki.
Caribe su beyesa natural y importancia ecologico cada biaha ta den mas riesgo, y esaki ta enfatisando e necesidad pa conscientisacion global y accion.
