Despues cu horcan catastrofico di Categoria 5, Melissa a pasa riba Jamaica diahuebs 28 di october, esaki a causa un gran desvastacion den e parti oost di e isla. E comunidad di Aruba ta uni den esfuerso di ayudo y sosten pa nos isla ruman di Jamaica.
Gobierno di Aruba hunto cu Consul Honorario di Jamaica na Aruba ta coordinando activamente e ayudo y sosten bao di un (MoU) pa facilita un reaccion humanitario conhunto. Diabierna y dialuna ultimo tabatin diferente reunion na Bestuurskantoor pa coordina esfuerso di yudansa.
Donacion
Cruz Cora Aruba a mobilisa pa asisti den e esfuerso di ayudo. E canalnan pa donacion ta stableci pa sigura cu e ayudo por yega na Jamaica lihe y eficazmente.
Lo tin punto di donacion di Cruz Cora na varios lugarnan designa rond di e isla pa colecta contribucion pa Jamaica.
E donadornan tambe por contribui via e fondo Red Cross Aruba–Jamaica Relief Fund
Banco: Aruba Bank
Nomber di cuenta: Donate to Red Cross Aruba Jamaica Relief Fund
Number di cuenta: 0384010990
Articulo cu ta acepta y necesario ta inclui:
Articulo di cuminda di premira necesidad
Producto fresco (si ta sigur y apropia)
Articulo di higiena pa muhe y baby
Boter di awa
E Consul di Jamaica na Aruba ta den contacto cu YMCA Aruba pa explora e posibilidad di usa nan facilidadnan como lugar oficial pa entrega donacion, pa haci e distribucion mas facil y minimalisa problema di transporte.
Reunion cu comunidad
Un reunion pa e comunidad di Jamaica biba na Aruba lo tuma lugar e diahuebs aki na Kulture Cafe San Nicolas p 7:00 anochi.
Durante e reunion aki lo ta duna informacion tocante e proceso di donacion, lugar pa entrega y e coordinacion cu e representantenan di Jamaica y autoridad local.
Gobierno di Aruba a compronde for di e pueblo di Jamaica y su comunidad na Aruba cu nan ta expresa gran aprecio pa tur contribucion material, comestibel of financiero; pa sostene e esfuerso di ayudo y recuperacion di Jamaica.
