Ayera mainta minister di Turismo, Labor y Transporte, Wendrick Cicilia, a duna un declaracion na prensa relaciona cu e conferencia Platinum Associate Membership Advisory Council (PAMAC) organisa pa Florida Caribbean Cruise Association (FCCA), cu ta tumando luga na Aruba na e momentonan aki. E mandatario a elabora riba e importancia di e conferencia y su vision pa maneho di turismo crucero na Aruba.

Despues di ocho aña Aruba ta anfitrion atrobe pa e conferencia. Minister Cicilia a remarca cu e conferencia di PAMAC ta un evento fundamental y e miembronan di FCCA ta partnernan fundamental tambe den cuadro di turismo crucero di Aruba.

E mandatario a splica cu turismo crucero ta forma un parti esencial den e desaroyo economico di pais Aruba. El a indica cu Aruba por kibra tur record na pasaheronan crucero cu a yega e isla mirando cu pa aña Aruba ta ricibi alrededor di 100 mil pasahero crucero cu ta bin Aruba.

El a sigui splica cu segun estadisticonan Aruba tin un di e recordnan mas impresionante den Caribe pa loke ta trata e cantidad di placa cu turistanan cu ta bin cu crucero ta gasta ora nan ta bishita Aruba. El a indica cu no ta trata solamente e cantidad di placa cu nan ta gasta, pero tambe e tempo cu nan ta pasa na Aruba locual ta duna oportunidad na comercio y economia local, tour operators, restaurant, cafe, kiosknan cu ta bende souvenir, y tambe caya grandi ta beneficia di esaki

“Esaki ta un efecto positivo economico cu nos ta mira pa comunidad y marca tambe e importancia di e industria aki. Presente tin partnernan strategico di Aruba manera diferente liña di crucero, entre otro Norwegian, Royal, Caribbean. Nan ta actornan fundamental, partnernan strategico cu a scoge Aruba pa duna desaroyo na e industria di turismo crucero y awe nos ta akinan pa reafirma cu nos ta aprecia tambe e partnership strategico aki,” minister Cicilia a enfatisa.

Pa loke ta trata Gabinete AVP-FUTURO su vision pa maneho di turismo, el a splica cu gobierno di Aruba a comunica un vision hopi importante na e partnernan cu ta indica cu nan ta kere den un turismo sostenibel y responsabel, y nan ta kere den recalibra e crecemento turistico.

E mandatario a sigui splica cu esaki ta nifica cu nan a tuma pasonan concreto den dialogo cu e industria di sector hotelero caminda nan no kier mira mas un crecemento desbalansa pasobra, segun el a enfatisa, e sentimento local tambe ta un punto cu nan ta tuma como parti integral den nan maneho.

Alabes el a remarca cu nan kier mira si e beneficionan economico y e impacto cu e crecemento aki ta laga atras ta uno minimo y cu Aruba ta ricibi turismo crucero cu tin un beneficio economico pa e pais.

“Nos ta mira mas cu crecemento den e numbernan ta algo cu mester bay drenta den e discusion aki cu e industria di turismo crucero pa mira unda por haci ahustacion, pero manera indica caba cu vision di gobierno no ta mas volumen, pero ta mas enfoca riba calidad,” el a subraya.

Minister Cicilia a remarca cu esey e mensahe cu como gobierno nan lo comunica na e partnernan. “Parti di nos vision integral ta percura pa e industria turismo crucero su beneficio pa Aruba tin un impacto minimal riba locual ta efectonan dañino pa naturalesa, concentracion riba e beachnan y cu e beneficionan economico e empresarionan chikito y mediano ta ricibi e beneficio di esaki,” el a agrega.

El a indica cu di parti di gobierno nan a señala cu pa loke ta trata caya grandi nan ta bay haci inversionnan grandi pa garantisa cu tin espacio publico pa turismo di crucero, pero alabes, el a remarca, nan kier mira cu e calidad ta aumenta y no necesariamente e cantidad. “E turismo cu nos kier mira na Aruba ta esnan cu ta bin cu un capacidad di inversion mas grandi y no un crecemento den volumen,” el a señala.

Pa loke ta trata con ta bay stimula comercio pa tin mas actividad pa turismo crucero, specialmente teniendo cuenta cu hopi di tiendanan ta era riba diadomingo, minister Cicilia a splica cu den e dialogo cu stakeholders di caya grandi, un di e puntonan cu a toca tabata adaptacion den e ley di orarionan di negoshi cu ta crea e posibilidad pa negoshinan por keda habri mas largo.

El a sigui splica cu den caya grandi locual gobierno ta haciendo ta incentivando fluho y trafico di comunidad y turismo a traves di inversion y eventonan unda cu comunidad y turismo por bini hunto. El a menciona como ehempel e iniciativa di Gabinete AVP-FUTURO ‘Ban Bek Caya’ unda ta garantisa cu tin un fluho di comunidad y turismo den caya grandi.

El a agrega cu den e cuadro ay gobierno kier conecta y syncronisa e industria di turismo crucero cu APA pa mira con riba diadomingo por organisa un evento similar na ‘Ban Bek Caya’ pa por trece e turismo crucero den caya grandi y crea e ripple effect cu kier di e industria aki.

Pa loke ta trata Arutram, cu tampoco ta traha riba diadomingo, minister Cicilia a splica cu tin diferente plan pa cu esey tambe. Un di e plannan, el a indica, ta cu ta den discusion na e momentonan aki pa wak di APA por tuma Arutram over pa haci inversion pa garantisa cu tin mas fluho y trafico di tram cu ta un proyecto cu ta conecta e terminal di crucero cu caya grandi.