Den e dianan aki nos ta tende varios opinion tocante loke Hulanda ta bin haci bao di e capa di e entidad di Reino COHO, cu ta varia di dudoso te na hororoso. Ademas comentario tocante e nomber cu na Hulandes ta zona neutral, pero na Papiamento ta manera algo cu no ta inculca confianza, mescos cu su predecesor CHE.

En berdad Aruba tabata conoce un entidad (local) caba cu un nomber straño, o bien aplicable, cu ta e fundacion SOGA, na Spaño un cabuya (di horca). Te awor nos no ta bay bisa cu e no a cumpli cu su nomber, pasobra no mester lubida cu e proyecto dudoso di renobacion di Hospital ta cay bao di e capa aki, asina ta cu nos por spera sorpresa ainda. Pero poniendo e consideracionnan humoristico aki un banda, loke nos ta tende hopi biaha ta e pensamento cu e pais madre ta bin comete un asalto aki y lo ta bin haci cos aki cu no ta corecto. Esey no ta asina; ningun di e temanan menciona den e plan di accion, e famoso Landspakket, ta cosnan cu a bin cay for di cielo, tur ta asunto cu pa añanan largo tur organismo di conseho cu gobierno conoce a trece dilanti mil y un vez, banda di hopi ciudadano cu tambe tabata señala e cosnan aki. Tur esey a pasa bay sin cu realmente tabatin un cambio di rumbo cu por a duna nos e seguridad cu nos gobernantenan, di diferente color politico, tabata consciente di e necesidad di e cambionan aki.

Pa pone e asunto bon cla: Hulanda no a bin pa destrui un pais prospero y bon organisa, al contrario. Y pa ta exacto, nos ta e aña aki cumpliendo nos promer lustro bao di supervision financiero di Reino/Hulanda cu, mester bisa, realmente no a duna e resultado cu nos tabatin mester, y esey pa e resistencia grandi cu e supervision a encontra, tanto di gobierno anterior como e actual. Tur dos tabata argumenta cu “nos mes por” mientras e intervencion tabata hustamente pasobra a proba caba cu ‘nos mes no por’. Mester bisa cu si tabatin un plan pa sali di e abismo financiero hunto cu e supervision financiero den e proximo añanan, cu pa 2020 lo mester a resulta caba den un suplus na fin di aña. Loke tambe mester bisa cu e plan ey tabata contempla mas aumenta entrada di gobierno na lugar di reduci gasto. E cifranan ta papia pa nan mes: na 2019 gobierno tabatin alrededor di Afl. 1.400 miyon na entrada, como Afl. 100 miyon mas cu e aña anterior, mientras cu na 2020 tambe lo a aumenta entrada cu mesun suma mas o menos, pa duna gobierno e ‘rosea’ cu lo tabatin mester. E ‘rosea’ ey tabatin bin di nos cartera como ciudadano y empresario. Tambe ta bon pa menciona cu un parti sustancial di entrada di gobierno den ultimo añanan tabata bin di e dividendo di e empresanan estatal, loke por interpreta como ‘verkapte belasting’, mientras cu di otro banda tabata subsidia e empresanan estatal cu tabata rozando bancarota, sin soluciona nan situacion.

E banda di corta gasto, no mester a sorprende nos cu ey si no a traha cu mesun afan pa percura pa espacio financiero. Cu consecuencia cu nos no tabata mira ainda e esfuerzonan pa cuminza mehora prestacion di gobernacion, salvo algun excepcion positivo, pa brinda e ciudadano algo pa loke e tabata paga. Y… despues, a bin Covid-19. Ora e desastre a bira visible, tabata obvio tambe cu ta na un lugar so nos por a acudi. Esey no a evita algun hende prufia pa bisa Hulanda cu no ta cuestion di yuda pasobra nan kier pasa pa bon hende, sino cu ‘nos tin derecho’… Un actitud completamente rechazable ora bo ta esun benta abao y ta sclama auxilio. Awor, tanto luna despues, a yega porfin na e acuerdo cu por a cera tanto luna pasa tambe. E noticia bon ta cu tin un acuerdo, y mal noticia ta cu nos no ta convenci cu realmente lo surgi un colaboracion leal y berdadero, cu ta duna nos un vista positivo pa futuro. Ta dificil pa simplemente pone un banda tur e oposicion cu tabatin den e ultimo decadanan pa haci e cambionan necesario riba nos mes. E unico cos cu nos tabata mira cu cada eleccion e otronan cu tabata bin dilanti pa bisa nos cu “awor si nos ta bay traha manera mester ta”. Nos no a mira tanto di esey y awor ya nos ta den e fase unda nos no ta depende mas di e ‘benevolencia’ di gobierno mas. Tin cosnan cu mester bay drecha ‘por la buena o por la mala’. E actual gobierno y mas en general e aparato publico por scoge cu ta bay colabora lealmente cu e operacion di varios aña aki, o trata di tranca cos manera nos a mira tanto biaha caba den e ultimo decadanan. Nos ta sigur cu no tur cos cu COHO ta propone lo ta e mihor idea, pero ta solamente den bon colaboracion por convence otro kico ta e mihor opcion den nos situacion. Loke mester keda corda si, cu no ta nan a haci Aruba ‘coho’. Aruba tabata cana coho caba; y nos no por sigui asina.

 

LEAVE A REPLY

Please enter your comment!
Please enter your name here